“Daryo” nashri 14-noyabrda O‘zbekiston va jahonda sodir bo‘lgan eng muhim voqealarni e’tiboringizga havola etadi.
Saida Mirziyoyeva Prezident administratsiyasida sho‘ba mudiri etib tayinlandi
Bugun 14-noyabrda Prezident farmoyishi bilan Saida Shavkatovna Mirziyoyeva Prezident administratsiyasi Ijro etuvchi apparatining Kommunikatsiyalar va axborot siyosati bo‘yicha sho‘ba mudiri lavozimiga tayinlandi.
Ta’kidlanishicha, ushbu sho‘ba yangidan tuzilgan bo‘lib, administratsiya rahbarining jamoatchilik fikrini o‘rganish va axborot siyosati uchun mas’ul o‘rinbosari tizimi tarkibiga kiradi. Shuningdek, Saida Mirziyoyeva ijtimoiy soha, madaniyat va ta’lim sohalaridagi islohotlar ijrosining borishini ham nazorat qiladi.
Vladimir Zelenskiy Rossiya bosqinidan ozod qilingan Xersonga tashrif buyurdi
Ukraina prezidenti Vladimir Zelenskiy Xersonga tashrif buyurdi. Bu haqda guvohlarga tayanib, Reuters xabar bermoqda.
Nashrning yozishicha, u yerda Zelenskiy Ukraina tinchlik muzokaralariga tayyorligini yana bir bor ma’lum qilgan va u yerdagi harbiylarni nishon bilan taqdirlagan.“Biz olg‘a intilyapmiz va tinchlikka, butun mamlakatimiz uchun tinchlikka tayyormiz”, — degan Zelenskiy.
Ayni vaziyatda Ukraina mudofaa vaziri Qrimning jangsiz qaytarib olinishiga ishonch bildirgan.Xersonda davom etayotgan “barqarorlashtirish choralari” va minalarni zararsizlantirish ishlari tufayli jurnalistlarga shaharga kirish hozircha taqiqlangan.
Bir qancha jurnalistlar, jumladan, CNN va Sky News g‘arbiy telekanallari Xersondan reportaj tayyorlaganidan so‘ng, Ukraina hukumati ularni akkreditatsiyadan mahrum qildi.Eslatib o‘tamiz, o‘tgan hafta Rossiya Mudofaa vazirligi Xersondan chekinayotgani haqida xabar berdi.
11-noyabr kuni kechqurun Ukraina harbiylari Xerson shahri va uning atrofidagi qishloqlarga kira boshladi. Ularni kutib olish uchun minglab aholi Ukraina bayroqlari bilan ko‘chaga chiqdi. Ayni vaziyatda ushbu holat yuzasidan Rossiya prezidenti matbuot kotibi Dmitriy Peskov jurnalistlarga: "Biz buni izohsiz qoldiramiz. Bu Rossiyaning hududi ekanini bilasiz" deya ma'lum qilgan.
Rossiyada Sovet davridagi maktab o‘quvchilarini harbiy tayyorlash dasturi qaytarildi
Rossiyada 1993-yilda bekor qilingan Sovet davridagi maktab o‘quvchilarini harbiy tayyorlash dasturi qaytarildi. Bu haqda Buyuk Britaniya Mudofaa vazirligi ma’lumot berdi.Vazirlik e’lon qilgan hisobotga ko‘ra, bu chora-tadbirlar boshqa davlatga qarshi bosqinchilik urushi fonida Rossiyada ko‘plab “vatanparvarlar”ni shakllantirish uchun zarur.
Harbiy tayyorgarlik davomida boshqa narsalar qatori Kalashnikov avtomatlaridan foydalanish ham o‘rgatilishi ma’lum qilingan. Tahlilchilar 2014-yilda Rossiya Qrimga bostirib kirganidan keyin bu treningni jonlantirishga harakat qilinganini eslatdi.
Hozirda o‘quv dasturi ishlab chiqilmoqda va 2022-yil oxirigacha yakunlanadi. Keyin u tasdiqlash jarayonidan o‘tadi”, — deyiladi Britaniya razvedkasi hisobotida. Rossiya Mudofaa vazirligi ushbu jarayonni qo‘llab-quvvatladi va har o‘quv yilida kamida 140 soat ushbu mashg‘ulotga bag‘ishlanishi kerakligini ta’kidladi.
“Mazkur mashg‘ulotlar o‘quvchilarni harbiy yoshga yetganda harbiy ko‘nikmaga ega bo‘lish, ularning safarbarlik va harbiy xizmatga shayligini oshirish uchun mo‘ljallangan bo‘lsa kerak”, — deydi tahlilchilar.
Bloomberg nashri avvalroq Rossiyada sovet davrlaridan buyon foydalanilmagan bombapanohlar yashirincha tekshirilib, yangilanayotganini xabar qilgandi. Bundan tashqari, Rossiya OAVlari Moskvadagi yerosti parkinglarida uxlash uchun joylar tayyorlanib, isitish uskunalari va aptechkalar o‘rnatilayotgani haqida yozgandi.
Turkiya portlash yuzasidan AQSH tomonidan bildirilgan hamdardlikni qabul qilishdan bosh tortdi
Turkiya ichki ishlar vaziri Sulaymon Soylu Istanbuldagi portlash munosabati bilan AQSH tomonidan bildirilgan hamdardlikni Anqara qabul qilishdan bosh tortishini ma’lum qildi, deb yozadi CNN Turk. “Biz Amerika elchixonasidan bildirilgan ta’ziyani qabul qilmaymiz. Biz hech kimga sotqinlik qilmayapmiz, lekin bizga qilinayotgan sotqinlikka ortiq chidab turolmaymiz”, — dedi u va Turkiya hukumati “hujum qayerda muvofiqlashtirilganidan xabardor bo‘lganini” ta’kidladi.
Avvalroq vazir AQSH Istanbuldagi terakt yuzasidan bildirgan rasmiy hamdardlikni tanqid qilgan va tez orada unga javob berilishini aytgandi. “Menimcha bugun AQSH tomonidan e’lon qilingan hamdardlikni qotilning voqea joyiga birinchilardan bo‘lib yetib kelishiga qiyoslash kerak. Va bu ta’ziyaga munosabat juda aniq bo‘ladi. Buni yaqin kelajakda ko‘rasiz”, — degan u.
Turkiya prezidenti 12-noyabr kuni AQSH prezidenti Jo Baydenni Anqarada taqiqlangan FETO tashkiloti rahbari Fatxulla Gulenni Pensilvaniyada yashirib o‘tirishda aybladi. Turkiya hukumati Gulenni 2016-yilgi davlat to‘ntarishiga urinishda asosiy javobgar deb hisoblaydi, uning o‘zi buni rad etadi. Gulen AQSHda yashaydi, Turkiya uni ekstraditsiya qilishni so‘ramoqda, ammo Vashington buni amalga oshirmayapti.
Bundan tashqari, Turkiya Shvetsiya va Finlyandiyaning NATOga qo‘shilishiga rozilik berganicha yo‘q. Erdo‘g‘onning aytishicha, bu mamlakatlar Turkiyada terroristik deb tan olingan tashkilotlar, xususan, Kurdiston ishchilar partiyasi ishtirokchilariga boshpana bergan.Istanbuldagi portlash 13-noyabr kuni sayyohlar orasida mashhur bo‘lgan Istiqlol ko‘chasida yuz berdi. Olti kishi halok bo‘lib, kamida 81 kishi jabrlandi. Oradan vaqt o'tib, Turkiya IIV portlashni sodir etgan shaxs qo‘lga olinganini ma’lum qildi. Ichki ishlar vaziri portlash ortida Kurdiston ishchilar partiyasi tarafdorlari turganini ma’lum qilgan.
O‘zbekiston energotizimida og‘ir oqibatli “avariya” – blekaut xavfi borligi ma’lum qilindi.“Har kuni elektr energiyasini tejash kunini nishonlayapmiz”. Namanganliklar Energetika vazirligidan hafsalasi pir bo‘lganini aytmoqda
Namanganda elektr ta’minotida muntazam uzilishlar ro‘y bermoqda va bu holat aholining haqli e’tirozlariga sabab bo‘lmoqda. Bu haqda “Daryo” muxbiri Azizbek Abduvaliyev xabar berdi.
Kuz-qish mavsumi kirib kelganidan so‘ng viloyatda elektr energiyasi bo‘yicha murojaatlar ko‘paygani, fuqarolar dispetcherlik xizmatlari yoki Call-markazlarga qo‘ng‘iroq qilib tushishga qiynalayotganidan so‘ng “Namangan hududiy elektr tarmoqlari” korxonasi tomonidan ijtimoiy tarmoqlarda “Namangan elektr ta’minoti” deb nomlangan guruh ochilgan. 7,5 mingga yaqin a’zosi bo‘lgan ushbu guruh viloyatning turli hududlaridan yo‘llangan murojaat, shikoyat va savollarga ko‘milib ketgan.
“11-noyabr Xalqaro elektr energiyasini tejash kuni ekan. Namanganda bu sanani har kuni nishonlayapmiz” deya kinoya qiladi foydalanuvchilardan biri.
Chortoq tumanidan yozilgan shikoyatda esa: “Bizda to‘rt soatlab elektr yonmayapti. Eng qizig‘i, atrofimizda beshta sanatoriy bor. Dam olayotganlar respublikaning barcha viloyatlaridan kelishadi. Bu ‘svet’ o‘chishining oxiri bormi o‘zi?” deya murojaat qilgan. Yana bir foydalanuvchi esa “Elektr ta’minoti korxonasini UzAuto’dan nima farqi bor? Sizlar ham oldindan to‘lov qildirib istalgan payt ‘svet’ berasizlar, u ham nari borsa 5 daqiqaga” deya munosabat bildirgan.
Milliy dispetcherlik markazi Namangan hududiy bo‘limi boshlig‘i Muhammadali Irisqulovning aytishicha, sovuq kunlar boshlanishidan avval viloyatga kuniga 13 million kilovatt-soat elektr energiyasi yetkazib berilgan va ta’minotda deyarli muammo yuzaga kelmagan. Hozirda bu ko‘rsatkich 15,5 million kilovatt-soatga chiqarilgan, biroq ehtiyojni qoplab bo‘lmayapti.
Ijtimoiy tarmoq faoli Shukurjon To‘xtasinovning aytishicha, chindan ham Uychi tumani eng muammoli hududlardan biri bo‘lib, ba’zan tuman elektr tarmoqlari korxonasi, hatto hokimlikda ham “svet” yo‘q. “Masalaning yana bir tomoni bor. Aholi va ijtimoiy muhim obyektlarga tabiiy gaz yetkazib beramiz degan bahona bilan Namangandagi barcha metan gaz zapravkalar 12 soatlik cheklovga o‘tkazildi. Lekin baribir ahvol o‘zgarmadi, aksincha battar bo‘ldi: aholida baribir gaz yo‘q, elektr energiyasida doimiy uzilishlar, ustiga-ustak avtomobillarga gaz to‘ldirish shoxobchalaridagi turnaqator navbatlar”, — deya ma'lum qilgan Shukurjon To‘xtasinov.
Avvalroq O‘zbekiston energotizimida og‘ir oqibatli “avariya” – blekaut xavfi borligi ma’lum qilingan.
Izoh (0)