Yaponiya O‘zbekistonda litiy batareyalarini ishlab chiqarish masalasini o‘rganmoqda

O‘zbekiston va Yaponiya o‘rtasidagi iqtisodiy hamkorlik masalalari muhokama qilindi, deb xabar qilmoqda “Dunyo” axborot agentligi.

Qayd etilishicha, O‘zbekistonning Yaponiyadagi elchisi Muhsinxo‘ja Abdurahmonov 25-oktabr kuni Toshkent shahrida bo‘lib o‘tgan ikki tomonlama iqtisodiy hamkorlik qo‘mitalarining 16-yig‘ilishi yakunlari hamda kelgusidagi hamkorlik yo‘nalishlarini muhokama qilish maqsadida Yaponiya–O‘zbekiston iqtisodiy hamkorlik qo‘mitasi raisi vazifasini bajaruvchi, Itochu korporatsiyasi maslahatchisi Suyoshi Nishitani bilan uchrashdi.

Suyoshi Nishitani ushbu tadbir yuqori saviyada tashkil etilganini ta’kidlab, so‘nggi yillarda O‘zbekistonda bo‘layotgan o‘zgarishlar, xorijiy investorlar uchun yaratilayotgan sharoitlar yapon biznes doiralari vakillarida katta taassurot qoldirganini bildirdi.

U, shuningdek, O‘zbekiston tomoni 2019-yilda O‘zbekiston prezidentining Yaponiyaga tashrifi mobaynida erishilgan kelishuvlarning ijrosi bo‘yicha ishlar olib borayotganini alohida ta’kidlab o‘tdi. Shu bilan birga, Itochu korporatsiyasi maslahatchisi yapon biznes-doira vakillarining O‘zbekistonda qishloq xo‘jaligi, farmatsevtika, tog‘-kon sanoati, mashinasozlik, kimyo va to‘qimachilik sanoati sohalarida qo‘shma investitsiyaviy loyihalarni amalga oshirishga katta qiziqishi mavjudligini bildirdi.

Shuningdek, hozirgi kunda mamlakatda litiy batareyalarini ishlab chiqarish masalasi Yaponiya tomonidan o‘rganib chiqilayotganini ma’lum qildi.