Ўзбекистон ва Япония ўртасидаги иқтисодий ҳамкорлик масалалари муҳокама қилинди, деб хабар қилмоқда «Дунё» ахборот агентлиги.
Қайд этилишича, Ўзбекистоннинг Япониядаги элчиси Муҳсинхўжа Абдураҳмонов 25 октябрь куни Тошкент шаҳрида бўлиб ўтган икки томонлама иқтисодий ҳамкорлик қўмиталарининг 16-йиғилиши якунлари ҳамда келгусидаги ҳамкорлик йўналишларини муҳокама қилиш мақсадида Япония–Ўзбекистон иқтисодий ҳамкорлик қўмитаси раиси вазифасини бажарувчи, Itochu корпорацияси маслаҳатчиси Суёши Нишитани билан учрашди.
Суёши Нишитани ушбу тадбир юқори савияда ташкил этилганини таъкидлаб, сўнгги йилларда Ўзбекистонда бўлаётган ўзгаришлар, хорижий инвесторлар учун яратилаётган шароитлар япон бизнес доиралари вакилларида катта таассурот қолдирганини билдирди.
У, шунингдек, Ўзбекистон томони 2019 йилда Ўзбекистон президентининг Японияга ташрифи мобайнида эришилган келишувларнинг ижроси бўйича ишлар олиб бораётганини алоҳида таъкидлаб ўтди. Шу билан бирга, Itochu корпорацияси маслаҳатчиси япон бизнес-доира вакилларининг Ўзбекистонда қишлоқ хўжалиги, фармацевтика, тоғ-кон саноати, машинасозлик, кимё ва тўқимачилик саноати соҳаларида қўшма инвестициявий лойиҳаларни амалга оширишга катта қизиқиши мавжудлигини билдирди.
Шунингдек, ҳозирги кунда мамлакатда литий батареяларини ишлаб чиқариш масаласи Япония томонидан ўрганиб чиқилаётганини маълум қилди.
Изоҳ (0)