Afg‘onistonning Da Afghanistan Breshna Sherkat (DABS) elektr kompaniyasi O‘zbekistondan mamlakatga yetkazib beriladigan elektr zanjiri texnik nosozlik tufayli uzilganini ma’lum qildi. Bu haqda Hasht-e Subh Daily xabar berdi.
“Breshna” kompaniyasi ma’lumotiga ko‘ra, muammo ikki kun ichida hal qilinishi kutilmoqda. Hozirda Kobulning ayrim viloyat va tumanlaridagi aholi elektrsiz yashamoqda.
“Elektrga bo‘lgan talabni kamaytirish uchun Turkmaniston elektr energiyasi Kobulga yetkazib beruvchi elektr zanjiriga ulanadi. Mahalliy elektr energiyasidan foydalanish esa davom etadi”, — deydi “Breshna” matbuot kotibi Kamtulloh Mayvand.
Afg‘onistondagi 13 viloyat, jumladan, Kobulda elektr energiyasi O‘zbekistondan import qilinishi hisobiga ta’minlanadi. Qo‘shni respublika elektr energiyasini Eron, Turkmaniston va Tojikistondan ham import qiladi.
Avgust oyida O‘zbekiston Energetika vazirligi Afg‘onistonning 2021-yil uchun yetkazib berilgan elektr energiyasidan qarzdorligi mavjud emasligini e‘lon qilgandi. 2022-yilda ham to‘lovlar amalga oshirilayotgani qo‘shimcha qilingan.
Ma’lumot uchun, 2002-yildan boshlab O‘zbekistondan Afg‘onistonga elektr energiyasi yetkazib borilmoqda. Dastlabki yillarda 10 kV kuchlanishli elektr uzatish tarmoqlaridan texnologik imkoniyatlaridan kelib chiqqan holda Da Afghanistan Breshna Sherkat (DABS) kompaniyasi bilan tuzilgan shartnomalar bo‘yicha elektr energiyasi yetkazib berilgan.
2009-yilda ikkita 220 kV kuchlanishli elektr uzatish tarmog‘i qurilishi yakunlanib ishga tushirilganidan so‘ng Afg‘onistonga 430 MVtgacha quvvatda elektr energiyasi yetkazib berilmoqda.
Izoh (0)