Афғонистоннинг Da Afghanistan Breshna Sherkat (DABS) электр компанияси Ўзбекистондан мамлакатга етказиб бериладиган электр занжири техник носозлик туфайли узилганини маълум қилди. Бу ҳақда Hasht-e Subh Daily хабар берди.
«Брешна» компанияси маълумотига кўра, муаммо икки кун ичида ҳал қилиниши кутилмоқда. Ҳозирда Кобулнинг айрим вилоят ва туманларидаги аҳоли электрсиз яшамоқда.
«Электрга бўлган талабни камайтириш учун Туркманистон электр энергияси Кобулга етказиб берувчи электр занжирига уланади. Маҳаллий электр энергиясидан фойдаланиш эса давом этади», — дейди «Брешна» матбуот котиби Камтуллоҳ Майванд.
Афғонистондаги 13 вилоят, жумладан, Кобулда электр энергияси Ўзбекистондан импорт қилиниши ҳисобига таъминланади. Қўшни республика электр энергиясини Эрон, Туркманистон ва Тожикистондан ҳам импорт қилади.
Август ойида Ўзбекистон Энергетика вазирлиги Афғонистоннинг 2021 йил учун етказиб берилган электр энергиясидан қарздорлиги мавжуд эмаслигини эълон қилганди. 2022 йилда ҳам тўловлар амалга оширилаётгани қўшимча қилинган.
Маълумот учун, 2002 йилдан бошлаб Ўзбекистондан Афғонистонга электр энергияси етказиб борилмоқда. Дастлабки йилларда 10 кВ кучланишли электр узатиш тармоқларидан технологик имкониятларидан келиб чиққан ҳолда Da Afghanistan Breshna Sherkat (DABS) компанияси билан тузилган шартномалар бўйича электр энергияси етказиб берилган.
2009 йилда иккита 220 кВ кучланишли электр узатиш тармоғи қурилиши якунланиб ишга туширилганидан сўнг Афғонистонга 430 МВтгача қувватда электр энергияси етказиб берилмоқда.
Изоҳ (0)