Ukraina Qurolli kuchlari bosh shtabi Belarusdagi kasalxonalar yarador va kasal rus askarlari bilan to‘lib-toshgani haqida ma’lumot berdi. Bu haqda BBC rus xizmati xabar berdi.
Ma’lumotlarga ko‘ra, bir sutka davomida Rossiya armiyasi Lugansk va Donetsk viloyatlaridagi Ukraina pozitsiyalariga hujum qilishga urinib ko‘rdi. Xerson viloyatida Ukraina harbiylari qayta egallangan aholi punktlarini ozod qilishda davom etmoqda. Shu bilan birga, rus armiyasi Dneprning chap qirg‘og‘ida mudofaa pozitsiyalarini qurmoqda.
So‘nggi 24 soat ichida u yerdan to‘rtta raketa va 16 ta havo zarbasi berildi, bir nechta raketa tizimlaridan 40 dan ortiq hujum uyushtirildi. Zaporojye, Cherkas, Xarkov va Donetsk viloyatlaridagi 20 dan ortiq aholi punktlari ham Rossiya qo‘shinlari tomonidan havo va raketa zarbalariga uchragan, deya xabar beradi Ukraina Bosh shtabi 13-noyabrdagi hisobotida.
Shuningdek, hisobotda Ukraina Belarus hududida Rossiya—Belarus qo‘shinlari guruhining shakllanishini kuzatishda davom etayotgani, razvedka ma’lumotlariga ko‘ra, Brest viloyatining rus armiyasi joylashgan hududlarida ijtimoiy sohaga yuk sezilarli darajada o‘sgani ta’kidlandi. Xususan, mahalliy kasalxonalar chodir lagerlaridagi yomon sharoit tufayli yarador va kasal bo‘lgan rossiyalik harbiy xizmatchilar bilan to‘lib-toshgan.
“Natijada shifokorlar davolanishga muhtoj bo‘lgan Belarus fuqarolariga xizmat ko‘rsatishdan bosh tortishga majbur”, — deyiladi xabarda.
Bundan tashqari, Ukraina Qurolli kuchlari Bosh shtabi 12-noyabr kuni safarbar qilingan ruslar orasidan yana bir qismi Zaporojye viloyatining bosib olingan Melitopol shahriga yetib kelgani, so‘ng oziq-ovqat, kiyim va ko'p miqdorda spirtli ichimliklar sotib olishni boshlaganini qo‘shimcha qildi.
BBC ochiq manbalar asosida 11-noyabr holatiga ko‘ra, Ukrainada 8712 dan nafar rossiyalik harbiy halok bo‘lganini aniqladi. Ular orasida kamida 163 kishi safarbar qilinganlardan. Ulardan yana 35 nafari frontga yuborilgunga qadar Rossiyaning o‘zida vafot etgan.
Izoh (0)