Prezident matbuot kotibi Sherzod Asadov ishtirokida o‘tkazilgan brifingda TDT sammitining asosiy tadbirlari haqida ma’lumot berildi. Bu haqda “Daryo” muxbiri xabar berdi.
Bugun kun davomida Turkiya prezidenti Rajab Toyyib Erdo‘g‘on, Qozog‘iston prezidenti Qosim-Jo‘mart To‘qayev, Qirg‘iziston prezidenti Sadir Japarov, shuningdek, ertaga 11-noyabr kuni tongda Turkmaniston Milliy Kengashi Xalq Maslahati raisi Gurbanguli Berdimuhamedovning tashrifi kutilyapti.
Kunning ikkinchi yarmida Shavkat Mirziyoyevning Rajab Toyyib Erdo‘g‘on va Ilhom Aliyevlar bilan ikki tomonlama uchrashuvlari bo‘lib o‘tadi. Shu bilan birga ertaga prezidentning Turkmaniston Milliy Kengashi Xalq Maslahati raisi Gurbanguli Berdimuhamedov bilan ham uchrashuvlari rejalashtirilgan.
“Bugun kechki vaqt Delegatsiya rahbarlari Samarqand turizm markazi hududidagi “Boqiy shahar” majmuasiga tashrif buyuradi. Turkiy davlatlar tashkiloti a’zo mamlakatlari milliy folklor san’atini o‘zida ifoda etgan konsert dasturi tashkil etiladi”, — deydi Sherzod Asadov.
Samarqand mammitining asosiy tadbiri — Turkiy davlatlar tashkiloti davlat rahbarlari kengashi majlisi ertaga 11-noyabr kuni Kongress markazda bo‘lib o‘tadi.
Mazkur sammit tashkilotning a’zo davlatlar rahbarlari tomonidan Shavkat Mirziyoyevning tashabbusini qo‘llab-quvvatlagan holda “Turkiy sivilizatsiyaning yangi davri: umumiy taraqqiyot va farovonlik sari” shiori ostida o‘tkazilmoqda.
Izoh (0)