Qashqadaryo viloyatining Qarshi shahrida 27-maktab o‘quvchisining yuqori sinf o‘quvchilari tomonidan kaltaklangani haqida xabar berilgandi. Viloyat IIB mas’ullari buni rad etdi.
Voqea tafsilotlarini bilishga uringan “Daryo” muxbiri vaziyatga aniqlik kiritdi.
Dastlab bolaning hozirgi ahvoli haqida ma’lumot olishga uringan jurnalist Murodjon Amirov o‘zini jabrlanuvchining bobosi deya tanishtirgan kishi e’tiroziga duch keldi.
Bolaning bobosi nabirasining ahvoli haqida ma’lumot bermasligini, uni kim kaltaklagani bilan bog‘liq holat haqida ham gapirmasligini aytdi.
Viloyat Sog‘liqni saqlash boshqarmasi axborot xizmati rahbari Nuriddin Egamovning ma’lumot berishicha, ayni paytda bemorning umumiy ahvoli o‘rtacha og‘ir va unga shifokorlar tomonidan kerakli davo muolajalari ko‘rsatilmoqda.
O‘sha kuni davomat qilganimda o‘quvchim darsda emasligi ma’lum bo‘ldi. Shunda uning onasiga qo‘ng‘iroq qilib, o‘quvchim haqida so‘radim. O‘quvchimning onasi maktabga borganda ahvolini ko‘rasiz, kechikib boradi dedi. Keyin o‘quvchim uchinchi soat darsga, 15:20larda og‘ir ahvolda kirib keldi. Bolaning bu ahvolini ko‘rgach, onasiga qo‘ng‘iroq qilib, xabardor qildim va shifoxonaga olib bordim, — deydi Madina Xo‘jayeva.
O‘qituvchining qo‘shimcha qilishicha, bola muloyim tabiatli bo‘lib, birov bilan urishadigan xarakterga ega bo‘lmagan.
Jabrlanuvchi yashovchi mahalladagi otaxon Mardon Mustafoqulov ham o‘quvchining oilasi namunali oila ekanini, ularning xonadonida janjal bo‘lmaganini aytmoqda.
Bolaning tarbiyasi yaxshi. Oila mahalladagi namunali oilalardan biri hisoblanadi, — deydi Mardon Mustafoqulov.
Qashqadaryolik bloger Kapitan Karimovning Qarshi shahar hokimi o‘rinbosari Furqat Normatovga tayanib yozishicha, bolani otasi kaltaklagan.
Shahar hokimi o‘rinbosarining qo‘shimcha qilishicha, maktab o‘quvchisini yuqori sinfdagi o‘quvchilar urmagan. Aksincha, bolani otasi urganligi ma’lum bo‘ldi. Tez orada batafsil ma’lumot beriladi, — deb yozadi bloger.O‘quvchi bolani yuqori sinfdagi o‘quvchilar urmaganligini viloyat IIB axborot xizmati ham tasdiqladi.
Sevimli kanalining “Zamon” informatsion ko‘rsatuvida ma’lum qilinishicha, bolani otasi kaltaklagan.
To‘g‘ri, men farzandimni urganman. Ammo bu darajada jarohat yetkazmaganman. Buni yashirmayman, barchasi ma’lum, — deydi bolaning otasi.Viloyat IIBning “Daryo”ga qo‘shimcha qilishicha, holat yuzasidan qo‘shimcha tergov-surishtiruv jarayonlari davom etmoqda.
Izoh (0)