Президент матбуот котиби Шерзод Асадов иштирокида ўтказилган брифингда ТДТ саммитининг асосий тадбирлари ҳақида маълумот берилди. Бу ҳақда «Дарё» мухбири хабар берди.
Бугун кун давомида Туркия президенти Ражаб Тоййиб Эрдўғон, Қозоғистон президенти Қосим-Жўмарт Тўқаев, Қирғизистон президенти Садир Жапаров, шунингдек, эртага 11 ноябрь куни тонгда Туркманистон Миллий Кенгаши Халқ Маслаҳати раиси Гурбангули Бердимуҳамедовнинг ташрифи кутиляпти.
Куннинг иккинчи ярмида Шавкат Мирзиёевнинг Ражаб Тоййиб Эрдўғон ва Илҳом Алиевлар билан икки томонлама учрашувлари бўлиб ўтади. Шу билан бирга эртага президентнинг Туркманистон Миллий Кенгаши Халқ Маслаҳати раиси Гурбангули Бердимуҳамедов билан ҳам учрашувлари режалаштирилган.
«Бугун кечки вақт Делегация раҳбарлари Самарқанд туризм маркази ҳудудидаги «Боқий шаҳар» мажмуасига ташриф буюради. Туркий давлатлар ташкилоти аъзо мамлакатлари миллий фольклор санъатини ўзида ифода этган концерт дастури ташкил этилади», — дейди Шерзод Асадов.
Самарқанд маммитининг асосий тадбири — Туркий давлатлар ташкилоти давлат раҳбарлари кенгаши мажлиси эртага 11 ноябрь куни Конгресс марказда бўлиб ўтади.
Мазкур саммит ташкилотнинг аъзо давлатлар раҳбарлари томонидан Шавкат Мирзиёевнинг ташаббусини қўллаб-қувватлаган ҳолда «Туркий цивилизациянинг янги даври: умумий тараққиёт ва фаровонлик сари» шиори остида ўтказилмоқда.
Изоҳ (0)