Қашқадарё вилоятининг Қарши шаҳрида 27-мактаб ўқувчисининг юқори синф ўқувчилари томонидан калтаклангани ҳақида хабар берилганди. Вилоят ИИБ масъуллари буни рад этди.
Воқеа тафсилотларини билишга уринган «Дарё» мухбири вазиятга аниқлик киритди.
Дастлаб боланинг ҳозирги аҳволи ҳақида маълумот олишга уринган журналист Муроджон Амиров ўзини жабрланувчининг бобоси дея таништирган киши эътирозига дуч келди.
Боланинг бобоси набирасининг аҳволи ҳақида маълумот бермаслигини, уни ким калтаклагани билан боғлиқ ҳолат ҳақида ҳам гапирмаслигини айтди.
Вилоят Соғлиқни сақлаш бошқармаси ахборот хизмати раҳбари Нуриддин Эгамовнинг маълумот беришича, айни пайтда беморнинг умумий аҳволи ўртача оғир ва унга шифокорлар томонидан керакли даво муолажалари кўрсатилмоқда.
Ўша куни давомат қилганимда ўқувчим дарсда эмаслиги маълум бўлди. Шунда унинг онасига қўнғироқ қилиб, ўқувчим ҳақида сўрадим. Ўқувчимнинг онаси мактабга борганда аҳволини кўрасиз, кечикиб боради деди. Кейин ўқувчим учинчи соат дарсга, 15:20ларда оғир аҳволда кириб келди. Боланинг бу аҳволини кўргач, онасига қўнғироқ қилиб, хабардор қилдим ва шифохонага олиб бордим, — дейди Мадина Хўжаева.
Ўқитувчининг қўшимча қилишича, бола мулойим табиатли бўлиб, биров билан уришадиган характерга эга бўлмаган.
Жабрланувчи яшовчи маҳалладаги отахон Мардон Мустафоқулов ҳам ўқувчининг оиласи намунали оила эканини, уларнинг хонадонида жанжал бўлмаганини айтмоқда.
Боланинг тарбияси яхши. Оила маҳалладаги намунали оилалардан бири ҳисобланади, — дейди Мардон Мустафоқулов.
Қашқадарёлик блогер Капитан Каримовнинг Қарши шаҳар ҳокими ўринбосари Фурқат Норматовга таяниб ёзишича, болани отаси калтаклаган.
Шаҳар ҳокими ўринбосарининг қўшимча қилишича, мактаб ўқувчисини юқори синфдаги ўқувчилар урмаган. Аксинча, болани отаси урганлиги маълум бўлди. Тез орада батафсил маълумот берилади, — деб ёзади блогер.Ўқувчи болани юқори синфдаги ўқувчилар урмаганлигини вилоят ИИБ ахборот хизмати ҳам тасдиқлади.
Севимли каналининг «Замон» информацион кўрсатувида маълум қилинишича, болани отаси калтаклаган.
Тўғри, мен фарзандимни урганман. Аммо бу даражада жароҳат етказмаганман. Буни яширмайман, барчаси маълум, — дейди боланинг отаси.Вилоят ИИБнинг «Дарё»га қўшимча қилишича, ҳолат юзасидан қўшимча тергов-суриштирув жараёнлари давом этмоқда.
Изоҳ (0)