“Har narsada chegara bo‘lishi lozim” — O‘zbekiston musulmonlari idorasi Umradan kelgan insonni kutib olishdagi dabdababozlikdan qaytardi

Ijtimoiy tarmoqlarda Umra ziyoratidan kelgan fuqarolarni kutib olishda dabdababozlik va isrofgarchilikka yo‘l qo‘yilgani aks etgan videolavhalar tarqaldi. Ularda safardan qaytgan inson uchun mahalla bo‘ylab gilam to‘shalgani, xonadonlar turli zeb-ziynatlar bilan to‘ldirilgani, umrachining tuya minib olganini ko‘rish mumkin.

Holat internet foydalanuvchilari o‘rtasida keng muhokamalarga sabab bo‘ldi. O‘zbekiston musulmonlari idorasi huzuridagi Fatvo markazi mutaxassisi Otabek Mamadiyev “Daryo” muxbiri Abduqahhor Qosimovga mazkur holat yuzasidan izoh berdi.

Otabek Mamadiyevning aytishicha, Haj va Umra amallarini bajarishda ba’zi insonlarda haddan oshish, isrofgarchilik va dabdababozlik holatlari kuzatilmoqda.

“Dinimizda bir qancha marosim va ziyofatlar bor. Ulardan biri musofir odam safardan kelgan payti uni yo‘qlab kelganlarga mehmondorchilik uyushtirish hisoblanadi. Bu Islomda bor marosimlardan bo‘lib, ulamolar mustahab deydi. Ya’ni, qilsa — savob bo‘ladi, qilmasa — gunoh bo‘lmaydi. Vojib ham, farz ham emas. Lekin shariatimizda bor amal”, — deydi Otabek Mamadiyev.

Mutaxassisning ta’kidlashicha, ziyofat o‘tkazishning o‘ziga yarasha tartibi, shart-sharoiti va shakli bor.

“Shunday tabarruk joydan kelgan insonni xalqimiz chin dildan xursand bo‘lib kutib oladi. Bu, albatta, go‘zal ish. Lekin har narsada chegara bo‘lishi lozim. Hozir, masalan, bir tuyani ijaraga olishyapti, uni ziynatlab, butun mahallaga gilam to‘shab, xonadonlarni qimmatbaho buyumlarga to‘ldirib, har bir kelayotgan ziyoratchiga sovg‘alar tarqatib, katta ziyofat qilish holatlari kuzatilyapti. Bularning ko‘pida isrofgarchilik bor”, — dedi u.

Mutaxassisning qo‘shimcha qilishicha, tuyalar, gilamlar, turli zeb-ziynatlarning nima keragi bor — bunda o‘zini ko‘rsatish, manmanlik, riyokorlik bor.

“Yana bir yomon tomoni — ibodatga nisbatan g‘urur paydo bo‘lib qoladi. Ibodatimiz qabul bo‘ldimi yo yo‘q, buni faqat Alloh biladi, hozir faqat umid qilolamiz, xolos. Bundan tashqari, mustahab bo‘lgan amalni haddan oshirib yuborish makruhga aylanib ketib qoladi. Har bir odam ibodatni o‘zi uchun qiladi. Boshqalarga ko‘z-ko‘z qilib, ularga qiyinchilik tug‘dirib qo‘ymaslik kerak. Qilayotgan ishlarimiz noshukurlikka kirib qolmasin”, — dedi Fatvo markazi mas’ul xodimi.