«Ҳар нарсада чегара бўлиши лозим» — Ўзбекистон мусулмонлари идораси Умрадан келган инсонни кутиб олишдаги дабдабабозликдан қайтарди

Ижтимоий тармоқларда Умра зиёратидан келган фуқароларни кутиб олишда дабдабабозлик ва исрофгарчиликка йўл қўйилгани акс этган видеолавҳалар тарқалди. Уларда сафардан қайтган инсон учун маҳалла бўйлаб гилам тўшалгани, хонадонлар турли зеб-зийнатлар билан тўлдирилгани, умрачининг туя миниб олганини кўриш мумкин.

Ҳолат интернет фойдаланувчилари ўртасида кенг муҳокамаларга сабаб бўлди. Ўзбекистон мусулмонлари идораси ҳузуридаги Фатво маркази мутахассиси Отабек Мамадиев «Дарё» мухбири Абдуқаҳҳор Қосимовга мазкур ҳолат юзасидан изоҳ берди.

Отабек Мамадиевнинг айтишича, Ҳаж ва Умра амалларини бажаришда баъзи инсонларда ҳаддан ошиш, исрофгарчилик ва дабдабабозлик ҳолатлари кузатилмоқда.

«Динимизда бир қанча маросим ва зиёфатлар бор. Улардан бири мусофир одам сафардан келган пайти уни йўқлаб келганларга меҳмондорчилик уюштириш ҳисобланади. Бу Исломда бор маросимлардан бўлиб, уламолар мустаҳаб дейди. Яъни, қилса — савоб бўлади, қилмаса — гуноҳ бўлмайди. Вожиб ҳам, фарз ҳам эмас. Лекин шариатимизда бор амал», — дейди Отабек Мамадиев.

Мутахассиснинг таъкидлашича, зиёфат ўтказишнинг ўзига яраша тартиби, шарт-шароити ва шакли бор.

«Шундай табаррук жойдан келган инсонни халқимиз чин дилдан хурсанд бўлиб кутиб олади. Бу, албатта, гўзал иш. Лекин ҳар нарсада чегара бўлиши лозим. Ҳозир, масалан, бир туяни ижарага олишяпти, уни зийнатлаб, бутун маҳаллага гилам тўшаб, хонадонларни қимматбаҳо буюмларга тўлдириб, ҳар бир келаётган зиёратчига совғалар тарқатиб, катта зиёфат қилиш ҳолатлари кузатиляпти. Буларнинг кўпида исрофгарчилик бор», — деди у.

Мутахассиснинг қўшимча қилишича, туялар, гиламлар, турли зеб-зийнатларнинг нима кераги бор — бунда ўзини кўрсатиш, манманлик, риёкорлик бор.

«Яна бир ёмон томони — ибодатга нисбатан ғурур пайдо бўлиб қолади. Ибодатимиз қабул бўлдими ё йўқ, буни фақат Аллоҳ билади, ҳозир фақат умид қилоламиз, холос. Бундан ташқари, мустаҳаб бўлган амални ҳаддан ошириб юбориш макруҳга айланиб кетиб қолади. Ҳар бир одам ибодатни ўзи учун қилади. Бошқаларга кўз-кўз қилиб, уларга қийинчилик туғдириб қўймаслик керак. Қилаётган ишларимиз ношукурликка кириб қолмасин», — деди Фатво маркази масъул ходими.