Andijon shahar adliya bo‘limi aralashuvi bilan Andijon shahar hokimligidan hokim qarori bilan buzilgan savdo do‘koni uchun tadbirkorga 2 milliard so‘mga yaqin kompensatsiya pullari undirib beriladigan bo‘ldi. Bu haqda “Daryo” muxbiri Umidjon Mamarasulov xabar bermoqda.
Andijon shahar adliya bo‘limi bosh maslahatchisi Azizbek Raupovning ma’lum qilishicha, Andijon shahrida faoliyat yuritgan “Zangori ekran trade” mas’uliyati cheklangan jamiyati rahbari Isroiljon Madragimov shahar adliya bo‘limiga murojaat qilib, jamiyatga tegishli bo‘lgan savdo do‘konining bino-inshootlari Andijon shahar hokimligi tomonidan davlat va jamoat ehtiyojlari uchun olib qo‘yilib, buzilganligi sababli kompensatsiya to‘lanmaganini ma’lum qilgan.
O‘rganish davomida jamiyat balansidagi Andijon shahar, Yangi bozor ko‘chasida joylashgan qurilish maydoni 740,65 kv/metrni tashkil etgan texnik savdo markazi binosi prezidentning 2017-yil 27-martdagi “2017—2019-yillar davrida dehqon bozorlarini rekonstruksiya qilish va ularning hududida zamonaviy savdo majmualari qurish dasturini tasdiqlash to‘g‘risida”gi qarori ijrosini ta’minlash maqsadida buzilishga tushganligi sababli Andijon shahar hokimligi tomonidan kelishuv shartnomasiga asosan olib qo‘yilgan.
Kelishuv shartnomasi shartlari bo‘yicha shahar hokimligi buzib tashlangan bino uchun tovon (kompensatsiya) puli evaziga yakka tartibda uy-joy qurish uchun Oltinko‘l tumani hududidan shahar hokimligi zaxirasiga olingan har biri 400,0 kv/metrdan iborat bo‘lgan 40 dona yer uchastkasini ajratib berish majburiyatini olgan. Shunga ko‘ra, 2018-yil davomida hokimlik tomonidan jami 26 ta belgilangan yer uchastkalari hokim qarori asosida ajratib berilgan. Biroq shu kunga qadar shartnoma shartlari to‘liq bajarilmagan yoki o‘rniga kompensatsiya puli to‘lab berilmagan.
O‘rganish davomida Respublika sud ekspertiza markazining viloyat bo‘limi ekspertining xulosasiga asosan 400,0 kv/metr yer maydonining bugungi kundagi bozor bahosi 136 million 178 ming 408 so‘m etib belgilab berilgan.
Vaholanki, o‘sha davrda amalda bo‘lgan O‘zbekiston Respublikasi Vazirlar Mahkamasining 2006-yil 29-maydagi 97-sonli qarori bilan tasdiqlangan “Davlat va jamoat ehtiyojlari uchun yer uchastkalarining olib qo‘yilishi munosabati bilan fuqarolarga va yuridik shaxslarga yetkazilgan zararlarni qoplash tartibi to‘g‘risida”gi nizomning 2 va 8-bandlariga muvofiq yer uchastkalarini olib qo‘yish kompensatsiyaning turlari ko‘rsatilgan. Shunga qaramasdan shu va boshqa qonun hamda qonunosti hujjatlariga rioya qilinmaslik natijasida shartnoma shartlari bajarilishi kechiktirilgan.
Mazkur holat yuzasidan Andijon shahar adliya bo‘limi tomonidan jamiyat manfaatini ko‘zlab hokimlik tomonidan buzdirilgan bino va inshootlar uchun kompensatsiya to‘lovlari hamda ekspertiza xarajatlarini undirib berish haqida Andijon tumanlararo iqtisodiy sudiga da’vo ariza kiritildi. Sud mazkur ish yuzasidan to‘plangan hujjatlarni o‘rganib chiqib, shahar hokimligidan jamiyat foydasiga jami 1 milliard 909 million 11 ming 712 so‘m kompensatsiya undirish to‘g‘risida hal qiluv qarorini qabul qildi.
Izoh (0)