O‘zbekistonliklarga Umra safarini rasmiylashtirish va Saudiya Arabistoniga bordi-keldi ishlari yanada qulaylashtiriladi. Bu haqda 29-sentabr kuni Saudiya Arabistoni haj va umra ishlari vaziri Tavfiq bin Favzon ar-Rabia Toshkent shahrida jurnalistlar bilan muloqotda aytib o‘tdi, deya xabar bermoqda “Daryo” muxbiri Musulmonbek Ibrohimov.
Muloqotda vazir Tavfiq bin Favzon ar-Rabia so‘zi avvalida delegatsiyani O‘zbekistonda yaxshi kutib olishgani va chiroyli mehmondo‘stlikni ko‘rganini aytib o‘tdi.
“Maqsadimiz hoji va Umra ziyoratchilariga barcha ishlarni yengillashtirish. Bunda asosiy ishlar Umra safarini rasmiylashtirish, bordi-keldi yo‘llarini qulaylashtirish va ularningoldida turgan to‘siqlarni bartaraf qilishdan iborat”, – dedi Tavfiq bin Favzon ar-Rabia.
Vazirning qo‘shimcha qilishicha, tashrifda o‘zbekistonlik ziyoratchilarni nafaqat Makka va Madina shaharlariga balki Saudiya Arabistonining boshqa shaharlariga ham sayohatlarni tashkil etish ko‘zda tutilgan.
Tashrifning birinchi kunida vazir Tavfiq bin Favzon ar-Rabia boshchiligidagi delegatsiyasi Din ishlari qo‘mitasi hamda Musulmonlar idorasi rahbarlari bilan uchrashuvda haj va umra xizmati sifatini oshirish, ziyorat narxini arzonlashtirish muhokama etilgan edi.
Prezident Shavkat Mirziyoyev vazir Tavfiq bin Favzon ar-Rabia boshchiligidagi delegatsiyani qabul qilish marosimida O‘zbekiston fuqarolari uchun yillik haj kvotasini ikki barobar — 24 ming nafargacha, umra kvotasini esa 100 ming nafargacha oshirish yuzasidan kelishuvga erishilgan.
Izoh (0)