AOKAda o‘tkazilgan brifingda Iste’molchilar huquqlarini himoya qilish agentligi axborot xizmati rahbari Mohruxsor Tog‘ayeva tovar va xizmatlarning sifatini oshirishga oid masalalar yuzasidan ma’lumot berdi.
Qayd etilishicha, respublika bo‘ylab 64 ta monitoring kuzatuvi o‘tkazilgan. 54 ta holatda (85 foiz) mahsulotlarning qalbaki namunalari sotilayotgani aniqlangan.
Inson salomatligi uchun zarar yetkazishi mumkin bo‘lgan sifatsiz va qalbakilashtirilgan oziq-ovqat mahsulotlarini realizatsiya qilmaslik yuzasidan sotuvchilarga tushuntirish berilgan.
Agentlikka joriy yil o‘tgan davri mobaynida iste’molchilardan 20 mingdan ortiq murojaat kelib tushgan. Shundan 35 foizi — sotib olingan mahsulot yoki ko‘rsatilgan xizmat sifati bilan bog‘liq.
Chakana savdo obyektlarida sotiladigan tovarlarning sifat va xavfsizlik ko‘rsatkichlariga mosligini tekshirish uchun 153 nomdagi mahsulotning nazorat xaridi amalga oshirilgan. Shundan 27 nomdagi mahsulot texnik jihatdan tartibga solish hujjatlariga mos emasligi aniqlangan.
Xususan, 12 ta holatda oziq-ovqat mahsulotlari, 15 ta holatda nooziq-ovqat mahsulotlari tegishli laboratoriya tahlillari natijalari asosida nomuvofiq deb topilgan. Aniqlangan kamchiliklar bartaraf etilgan.
Izoh (0)