Туркия президенти Ражаб Тоййиб Эрдўғон Россиянинг Херсон вилояти ғарбидан ҳарбий қисмларни олиб чиқиш қарорини қўллаб-қувватлашини маълум қилди. Бу ҳақда Anadolu хабар берди.
«Албатта, уруш тугашининг аниқ санасини айтиб бўлмайди. Бироқ Россиянинг Херсон бўйича охирги қарори, албатта, ижобий ва муҳим қадамдир», — дейди Эрдўғон.
Шунингдек, у Россия президенти Владимир Путин билан мулоқотни давом эттириш режалари ҳақида ҳам маълум қилган. «Биз Туркиянинг воситачилик ҳаракатлари муваффақият қозонишига ва урушнинг тинчликка айланишига умид қиламиз», — дея хулоса қилди Туркия раҳбари.
Маълумот учун, 9 ноябрь куни Херсон вилоятидаги Россия қўшинлари қўмондони Сергей Суровикин Россия мудофаа вазири Сергей Шойгуга вилоятнинг ўнг қирғоқ қисмини тарк этишни таклиф қилган ва Шойгу таклифни қабул қилганди.
Суровикиннинг айтишича, ҳозирги шароитда Херсон ва унга яқин аҳоли пунктларини тўлиқ таъминлаб бўлмайди. «Вазиятни баҳолаб, Днепрнинг чап қирғоғи бўйлаб мудофаа қилишни таклиф этаман», — деган у. Суровикин қарорини «қийин» деб атаган, аммо бу одамлар ҳаётини сақлаб қолишини таъкидлаган. 7 ноябрь куни эса Кремлда Херсондан воз кечиш эҳтимоли ҳақида гапирилган эди.
Изоҳ (0)