АҚШ урушда 100 мингдан ортиқ россиялик аскар ҳалок бўлган ёки яраланган, деб баҳолади. Украинанинг йўқотишлари ҳам шунча бўлиши мумкин

Украинадаги урушда 100 мингдан ортиқ россиялик ҳарбий ҳалок бўлди ёки яраланди, дея маълум қилди АҚШ Штаб бошлиқлари бирлашган қўмитаси раҳбари генерал Марк Милли.

«Украина томони ҳам худди шундай йўқотишларга учраган бўлиши мумкин», — деди Милли Нью-Йорк Иқтисодий клубида. Унинг айтишича, уруш бошланганидан бери 40 мингга яқин украиналик тинч аҳоли ҳалок бўлган, яна 15—30 миллион украиналик қочқинга айланган.

Генерал, шунингдек, Россиянинг Украинага бостириб киришини «катта стратегик хато» деб атади ва бунинг учун мамлакат «кўп йиллар» товон тўлашини айтди.

Милли ўз тахминларида нимага асослангани ва маълумотларни қаердан олгани ҳақида батафсил гапирмади. Reuters агентлигининг қайд этишича, генералнинг ҳисоб-китобларини мустақил тасдиқлаш имконсиз.

Уруш бошланганидан бери Россия Мудофаа вазирлиги Украинадаги йўқотишлари ҳақида бор-йўғи уч марта — охирги сафар 21 сентябрь, Россияда сафарбарлик бошланган куни эълон қилган эди. Ўшанда мудофаа вазири Сергей Шойгу жанговар ҳаракатлар пайтида 5937 нафар россиялик аскар ҳалок бўлганини айтди.

Украина Қуролли кучлари Бош штаби эса 9 ноябрь ҳолатига кўра, Россия томонининг йўқотишлари деярли 78 минг кишига етганини даъво қилмоқда.

Октябрь ойи ўрталарида «Важний историй»нинг Россия махсус хизматларидаги манбалари Россия армиясининг Украинадаги йўқотишлари 90 мингдан ортгани ҳақида хабар берган.