Chilonzorda IIB xodimi bilan tortishgan tadbirkorning binosi qurilmaydigan bo‘ldi. Chunki u Ortiqxo‘jayevga va’da bergan

Ijtimoiy tarmoqlarda Toshkent shahri Chilonzor tumanida qurilishi boshlanish arafasida turgan yangi ko‘p qavatli uy-joy binosi bo‘yicha quruvchi-tadbirkor hamda ichki ishlar xodimi o‘rtasidagi bahsli holat yuzaga kelgani tasvirlangan video tarqaldi. Qurilish vazirligi mas’ullardan iborat tezkor guruh vaziyatni o‘rganish maqsadida mazkur hududga borib, holatni o‘rganganini ma’lum qildi.

Ma’lum bo‘lishicha, Toshkent shahar hokimining 2020-yil 9-dekabrdagi tegishli qarori bilan fuqaro M.M. nomiga Chilonzor tumani Ko‘tarma mahallasi 10-mavzeda joylashgan 1, 9 hamda 39-uylar oralig‘idagi 0,1 gektar yer maydonida ko‘p qavatli uy-joy binosi qurish uchun ruxsat berilgan. Hujjatlar yig‘ma jildida tegishli davlat idoralarining buyruqlaridan ko‘chirmalar va bayonnomalar mavjud.

2021-yilning 13-noyabr kuni “Ko‘tarma” MFY raisi hamda hududga yondosh 1, 9, va 39-uylarning vakillari ishtirokida o‘tkazilgan kengash yig‘ilishida quruvchi tashkilot AT Kvartal Build MCHJ direktori U.H. tomonidan hududda obodonlashtirish, ko‘kalamzorlashtirish, nonvoyxona va keksalar guzari qurib berish bo‘yicha kafolat xati yozib berilgan.

Shundan so‘ng shu yilning fevral oyida hududda istiqomat qiluvchi aholi o‘z tashabbusi bilan maydonda daraxtlar ekishgan. Aholining bu boradagi fikri so‘ralganda ular daraxt ekish chog‘ida mazkur hududda qurilish boshlanishidan bexabar bo‘lganini ma’lum qilgan.

Qonunchilik palatasi deputati Rasul Kusherbayev ushbu qurilish to‘xtalishini ma’lum qildi. Uning aytishicha, 8-noyabr kuni Chilonzor tumanining 10-mavzesidagi aholi e’tirozlariga sabab bo‘layotgan qurilish masalasiga doir uchrashuv bo‘lib o‘tgan.

Ma’lum bo‘lishicha, bu joyga ko‘p qavatli uy qurish uchun kompensatsiya o‘rniga yer olgan tadbirkor, shahar hokimi va qurilishga ruxsat beruvchi kengashga agar bitta fuqaro qurilishga norozi bo‘lgan taqdirda, qurilishni darhol to‘xtatib, yerni topshirishga va’da berib, ruxsat olgan ekan. Tadbirkor kengashni aholi qurilishga rozi, deb ishontirgan.

“Shahar hokimi Jahongir Ortiqxo‘jayev tadbirkorga bu va’dani eslatganidan so‘ng, tadbirkor qurish rejasini to‘xtatishini aytdi va shu joyda masala yakunlandi.

Xullas ushbu joyda qurilish bo‘lmaydigan bo‘ldi.

Nima ham derdik: qurilishlar masalasida aholi fikri ustuvor bo‘layotgani rost bo‘lsin”, — deb yozadi deputat.