Чилонзорда ИИБ ходими билан тортишган тадбиркорнинг биноси қурилмайдиган бўлди. Чунки у Ортиқхўжаевга ваъда берган

Ижтимоий тармоқларда Тошкент шаҳри Чилонзор туманида қурилиши бошланиш арафасида турган янги кўп қаватли уй-жой биноси бўйича қурувчи-тадбиркор ҳамда ички ишлар ходими ўртасидаги баҳсли ҳолат юзага келгани тасвирланган видео тарқалди. Қурилиш вазирлиги масъуллардан иборат тезкор гуруҳ вазиятни ўрганиш мақсадида мазкур ҳудудга бориб, ҳолатни ўрганганини маълум қилди.

Маълум бўлишича, Тошкент шаҳар ҳокимининг 2020 йил 9 декабрдаги тегишли қарори билан фуқаро М.М. номига Чилонзор тумани Кўтарма маҳалласи 10-мавзеда жойлашган 1, 9 ҳамда 39-уйлар оралиғидаги 0,1 гектар ер майдонида кўп қаватли уй-жой биноси қуриш учун рухсат берилган. Ҳужжатлар йиғма жилдида тегишли давлат идораларининг буйруқларидан кўчирмалар ва баённомалар мавжуд.

2021 йилнинг 13 ноябрь куни «Кўтарма» МФЙ раиси ҳамда ҳудудга ёндош 1, 9, ва 39-уйларнинг вакиллари иштирокида ўтказилган кенгаш йиғилишида қурувчи ташкилот АТ Квартал Build МЧЖ директори У.Ҳ. томонидан ҳудудда ободонлаштириш, кўкаламзорлаштириш, нонвойхона ва кексалар гузари қуриб бериш бўйича кафолат хати ёзиб берилган.

Шундан сўнг шу йилнинг февраль ойида ҳудудда истиқомат қилувчи аҳоли ўз ташаббуси билан майдонда дарахтлар экишган. Аҳолининг бу борадаги фикри сўралганда улар дарахт экиш чоғида мазкур ҳудудда қурилиш бошланишидан бехабар бўлганини маълум қилган.

Қонунчилик палатаси депутати Расул Кушербаев ушбу қурилиш тўхталишини маълум қилди. Унинг айтишича, 8 ноябрь куни Чилонзор туманининг 10-мавзесидаги аҳоли эътирозларига сабаб бўлаётган қурилиш масаласига доир учрашув бўлиб ўтган.

Маълум бўлишича, бу жойга кўп қаватли уй қуриш учун компенсация ўрнига ер олган тадбиркор, шаҳар ҳокими ва қурилишга рухсат берувчи кенгашга агар битта фуқаро қурилишга норози бўлган тақдирда, қурилишни дарҳол тўхтатиб, ерни топширишга ваъда бериб, рухсат олган экан. Тадбиркор кенгашни аҳоли қурилишга рози, деб ишонтирган.

«Шаҳар ҳокими Жаҳонгир Ортиқхўжаев тадбиркорга бу ваъдани эслатганидан сўнг, тадбиркор қуриш режасини тўхтатишини айтди ва шу жойда масала якунланди.

Хуллас ушбу жойда қурилиш бўлмайдиган бўлди.

Нима ҳам дердик: қурилишлар масаласида аҳоли фикри устувор бўлаётгани рост бўлсин», — деб ёзади депутат.