Тошкент шаҳри Бектемир туманида кучли таъсир қилувчи дори воситалари муомалага киритилишининг олди олинди, деб хабар беради Иқтисодий жиноятларга қарши курашиш департаменти.
Қайд этилишича, Бош прокуратура ҳузуридаги департаментнинг Бектемир туман бўлими томонидан ИИБ ходимлари билан ҳамкорликда терговга қадар текширув ўтказилган. Унда «Иқбол» МФЙ ҳудудида фуқаро С.М. ўз яшаш хонадонида таркибида кучли таъсир қилувчи моддалар мавжуд бўлган жами 1 538 дона «Регапен» номли дори воситаларини ўтказиш мақсадида сақлаб келаётгани аниқланиб, ашёвий далил сифатида олинган.
Шунингдек, департаментнинг Бектемир туман бўлими томонидан ИИБ ходимлари билан ҳамкорликда ўтказилган яна бир терговга қадар текширувда «Мажнунтол» МФЙ ҳудудидаги «Шарқ» ЙПХ масканида фуқаро Б.Н.бошқарувидаги Lacetti автотранспорт воситаси кўздан кечирилган. Натижада 50 дона «Тропикамид» номли кучли таъсир қилувчи дори воситаларини Тошкент шаҳрида ўтказиш мақсадида олиб келаётгани аниқланиб, ашёвий далил сифатида олинган.
Мазкур ҳолатлар юзасидан Жиноят кодексининг 251-1-моддаси (кучли таъсир қилувчи ёки заҳарли моддаларни қонунга хилоф равишда муомалага киритиш) билан жиноят ишлари қўзғатилган. Ҳозирда тергов ҳаракатлари ўтказилмоқда.
Изоҳ (0)