O‘zbekistondagi xususiy universitetlardan biri auksionda sotib olgan binosini 45 mlrd so‘mga qayta sotmoqchi

Toshkent shahri, Yunusobod tumanidagi sobiq “Toshkentgeologiya” binosi kimoshdi savdosiga qo‘yildi. Bu haqda “E-auksion” portali xabar bermoqda.

Bino kimoshdi savdosiga O‘zbekistondagi xususiy universitetlardan biri Profi University tomonidan joylashtirilgan.

Yer uchastkasining umumiy maydoni — 0,18 gektar. Binoning maydoni — 1 828 kvadrat metr. Binoda suv, elektr ta’minoti va kanalizatsiya tizimi bor. Gaz ta’minoti yo‘lga qo‘yilmagan.

Lot izohida yozilishicha, ushbu 2 qavatli 20 ta xonadan iborat bino rasmda ko‘rsatilgan barcha jihozlari bilan birga sotiladi.

Auksionga qo‘yilgan inshootning boshlang‘ich bahosi — 45 mlrd so‘m. Arizalar 29-noyabr 09:00 ga qadar qabul qilinadi. Savdolar xuddi shu kuni 10:00 da boshlanadi.

Profi University ushbu binoni joriy yilning 23-iyun kuni auksionda 35,7 mlrd so‘mga sotib olgan edi.