Ўзбекистондаги хусусий университетлардан бири аукционда сотиб олган биносини 45 млрд сўмга қайта сотмоқчи

Тошкент шаҳри, Юнусобод туманидаги собиқ «Тошкентгеология» биноси кимошди савдосига қўйилди. Бу ҳақда «E-auksion» портали хабар бермоқда.

Бино кимошди савдосига Ўзбекистондаги хусусий университетлардан бири Profi University томонидан жойлаштирилган.

Ер участкасининг умумий майдони — 0,18 гектар. Бинонинг майдони — 1 828 квадрат метр. Бинода сув, электр таъминоти ва канализация тизими бор. Газ таъминоти йўлга қўйилмаган.

Лот изоҳида ёзилишича, ушбу 2 қаватли 20 та хонадан иборат бино расмда кўрсатилган барча жиҳозлари билан бирга сотилади.

Аукционга қўйилган иншоотнинг бошланғич баҳоси — 45 млрд сўм. Аризалар 29 ноябрь 09:00 га қадар қабул қилинади. Савдолар худди шу куни 10:00 да бошланади.

Profi University ушбу бинони жорий йилнинг 23 июнь куни аукционда 35,7 млрд сўмга сотиб олган эди.