Tanzaniyada yo‘lovchi samolyot qulashi oqibatida kamida 19 kishi halok bo‘ldi, deya ma’lum qildi mamlakat bosh vaziri Qosim Majaliva.
Tanzaniyaning eng yirik xususiy aviakompaniyasi Precision Air’ga qarashli samolyot 6-noyabr kuni ertalab halokatga uchragan edi. U Dor-es-Salamdan mamlakat shimoli-g‘arbidagi Bukobaga yo‘l olgan. Samolyot aeroportga qo‘nmoqchi bo‘lgan vaqtda Viktoriya ko‘liga qulagan.
Avvalroq uch nafar qurbon haqida xabar berilgandi, shuningdek, rasmiylar 28 kishi qutqarilganini ma’lum qilgan.
Tanzania Business Insight kompaniyasi dastlab samolyot bortida 53 kishi bo‘lganini xabar qildi. Keyinroq Citizen nashrining aniqlik kiritishicha, u yerda ikki uchuvchi, ikki styuardessa va 39 nafar yo‘lovchi – jami 43 kishi bo‘lgan.
Dastlabki ma’lumotlarga ko‘ra, baxtsiz hodisaga yog‘ingarchilik va yomon ob-havo sabab bo‘lgan. Politsiya ma’lumotlariga ko‘ra, samolyot 100 metr balandlikda payti ko‘lga qulashni boshlagan. Halokatdan keyin yomg‘ir to‘xtagan va qutqaruvchilar voqea joyiga yetib borgan.
BBC’ning guvohlarga tayanib xabar berishicha, samolyot suvga tushganidan so‘ng mahalliy baliqchilar unga suzib borgan va ochiq orqa lyuk orqali bir qancha yo‘lovchilarni qutqarishga muvaffaq bo‘lgan.
Izoh (0)