Кенгайиш ва қўшничилик сиёсати бўйича Европа комиссари Оливер Вархелининг айтишича, Украинанинг Европа Иттифоқига қўшилиши учун тайёргарлик йиллаб давом этади. Бу ҳақда Вархели Германиянинг Welt am Sonntag газетасига интервьюсида айтди.
«Европа Иттифоқининг ички бозори ва бошқа кўплаб муҳим сиёсий соҳаларида иштирок этишга тайёргарлик кўриш учун зарур бўлган кенг кўламли ишларни инобатга олсак, иттифоққа қўшилиш учун тўлиқ тайёргарлик бир ёки икки йилдан кўпроқ вақтни олиши мумкин», — деди Вархели.
Шу билан бирга, у «Украина ислоҳотларни тезда олға силжитиш ва уларни амалга ошириш учун зарур бўлган ишларни тезлаштириш тарафдори» деб қўшимча қилди ва буни «ижобий», деб баҳолади.
«Бироқ, еттита ислоҳотнинг ҳаммасини ҳам тез амалга ошириш имконсиз», — деди Европа комиссари. Унинг сўзларига кўра, ҳозирча музокараларни бошлаш жадвалини ҳам келишиб бўлмайди.
Ўз навбатида, Украина бош вазирининг Европа ва Евроатлантика интеграцияси бўйича ўринбосари Ольга Стефанишина мамлакат бу мақсадига келаси йил охиригача эришиш ниятида эканини таъкидлади. Унинг фикрича, масалан, коррупцияга қарши кураш ва адолат соҳасида салмоқли ислоҳотлар аллақачон амалга оширилган. «Биз уй вазифамизни бажаряпмиз», — деди Стефанишина Welt am Sonntag’га.
Изоҳ (0)