Farg‘onada IIB binosidan 15 yoshli o‘smir murdasi chiqqani aytilmoqda

Farg‘ona viloyatining Qo‘qon shahridagi IIB binosidan 15 yoshli bola murdasi chiqqani xabar berildi. Bu haqda jamoatchilikka xabar bergan bloger Olimjon Haydarov voqea yuzasidan Ichki ishlar vazirligi ham, prokuratura ham rasmiy axborot bermaganini ta’kidlagan.

Ma’lum bo‘lishicha, 15 yoshli o‘smir viloyatning Buvayda tumani Yangi Qo‘rg‘on shaharchasidagi savdo do‘konlarining biriga kirib, 16 ming 700 so‘m miqdoridagi mahsulotni xarid qilib, pulini to‘lamay chiqib ketadi.

Do‘kon egalari uni qaytarib, bunday qilishi noto‘g‘ri ekanini tushuntirib, uydagilarini chaqirishadi. Ammo o‘smir yigit uydagilarini chaqirmaydi. Shundan so‘ng do‘kon egalari esa hududdagi profilaktika inspektoriga xabar beradi. Bola shunda ham uydagilaridan qo‘rqqani boismi, uydagilari haqida ma’lumot bermaydi. Keyin u tumandagi IIBga olib borilib, psixolog yordamida so‘roq qilinib, ismi va yashash joyi aniqlanadi. Ammo bola yashagan hudud profilaktika inspektorini topish imkoni bo‘lmagani bois, bolaning shaxsi aniqlanmagani ro‘kach qilinib, u Qo‘qon shahridagi voyaga yetmaganlarga huquqiy yordam ko‘rsatish markaziga olib boriladi, — deydi bu haqda jamoatchilikka xabar bergan bloger.

Olti nafar bola 15 yoshli bolani bir sutka davomida urgan, uni o‘yinga tushirgan, xo‘rlagan. Ertasi kuni 17-oktabr kuni esa binodan o‘smir bolaning o‘ligi chiqqan, — deydi bloger.

Bosh prokuratura axborot xizmati rahbari Hayot Shamsutdinov holat yuzasidan axborot tayyorlanayotganini, tez orada batafsil ma’lumot berilishini ma’lum qilgan bo‘lsa, Ichki ishlar vazirligi axborot xizmati hozircha so‘rovga javob bermadi.