“O‘zbekistonda islomiy moliya yo‘lga qo‘yilsa, katta natijalarga erishish mumkin”– xalqaro ekspert

O‘zbekistonda islomiy moliya yo‘lga qo‘yilsa, yuqori natijalarga erishish mumkin. Bu haqda Samarqandda o‘tkazilgan iqtisodiy forum yopilishida Xalqaro islom savdo moliya korporatsiyasi bosh operatsion direktori Nazeem Noordali aytib o‘tdi, deya xabar bermoqda “Daryo” muxbiri.

Ekspertning ta’kidlashicha, respublikada musulmonlar ko‘pligi bois, islomiy moliya tizimi tez rivojlanishi mumkin.

O‘zbekistonga hali islomiy moliya chuqur kirib bormadi. Islomiy moliyalashni chakana savdo va boshqa barcha sohalarga kirib borishiga qonunchilik imkoniyat berishi kerak. Bunga iqtisodiyotning alternativ imkoniyati sifatida qarash lozim. O‘zbekistonda islomiy moliya yo‘lga qo‘yilsa, katta natijalarga erishish mumkin. Aytish kerakki, mamlakat bu tizimni joriy etsa, mintaqada islomiy kapital bozori uchun regional markazga aylanish ehtimoli katta. Chunki aholining aksariyat qismi musulmonlar.

“Bugungi O‘zbekiston iqtisodiyotini 2018-yildagisi bilan solishtirganda hukumat iqtisodiyotni transformatsiya qilishda katta natijalarga erishganini ko‘rish mumkin. Hozir mamlakatda kichik va o‘rta biznes rivojlanishi yaxshi jarayonda. Bank tizimi ham sifat darajasiga o‘tyapti. 2026-yilgacha belgilangan taraqqiyot strategiyasiga qarab, O‘zbekistonni o‘sib kelayotgan davlat deyish mumkin. Barcha qiyinchiliklarga qaramasdan rivojlanishga hukumat va xalq ishonchi hamda xohishi kuchli. Mamlakatni kelajakda yanada rivojlanishini ko‘rish istagidaman”, – dedi mutaxassis.

Avvalroq bosh vazir o‘rinbosari – iqtisodiy taraqqiyot va kambag‘allikni qisqartirish vaziri Jamshid Qo‘chqorov O‘zbekiston aholisini kelgusi besh yil ichida bir qator o‘zgarishlar kutayotganini aytgandi.

“Bu davrda elektr ishlab chiqarish stansiyalarini yashil energiya manbalariga almashtiramiz. Banklardan faqat bittasi davlat banki bo‘lib qoladi. Qolganlari xususiy bo‘ladi. Kelasi 5 yil ichida mamlakatda kambag‘allar soni 2 baravar kamayadi. Yalpi ichki mahsulot hajmi kishi boshiga 2 ming 800 dollarni tashkil qiladi”, – degan edi vazir.