“Daryo”da Samarqand viloyati hokimi Erkinjon Turdimov boshchiligidagi delegatsiya vakillarining Nukus tumaniga safari va safar davomidagi kechki ovqat salkam 88 million so‘mga tushgani xabar berilgandi. Mazkur maqolaga javoban Qoraqalpog‘iston Vazirlar Kengashi va Samarqand viloyati hokimligi axborot xizmati “Daryo”ga qo‘shimcha axborot berdi.
Samarqand viloyati hokimligi axborot xizmati rahbari Manuchehr Mirzayevning “Daryo”ga bildirishicha, Erkinjon Turdimov boshchiligidagi delegatsiya vakillarining Nukus tumaniga safari davomida viloyat tomonidan 250 ga yaqin jamoatchilik vakillari ishtirok etgan. Mazkur sanadagi tadbirlar doirasida Nukus tumanining 12 ta hududi (10 ta mahalla, istirohat bog‘i va Samarqand osh markazi)da samarqandliklar tomonidan osh damlanib, tushlik tashkil etilgan.
Shuningdek, tumanga 400 nafarga yaqin delegatsiya vakillari borib, Nukus tumaniga kiritilgan investitsiya loyihalari ishga tushirilishining tantanali ochilish marosimiga qatnashgan.
Maqolada qayd etilgan kechki dasturxon bevosita Qoraqalpog‘iston Respublikasi vakillari taklifi va tashabbusi bilan tashkil etilgan bo‘lib,unda Samarqand va Qoraqalpog‘iston Respublikasi jamoatchiligi vakillari qatnashishgan. Kechki tadbirlarda Samarqand viloyati hokimi Erkinjon Turdimov ishtirok etmagan, — deydi mas’ul.Qoraqalpog‘iston Vazirlar Kengashi axborot xizmati esa mazkur maqolaga raddiya bildirib, 87 million 907 ming so‘m pulning barchasi ovqat uchun sarflanmaganini bildirdi.
Qarorda ko‘rsatilgan xarajatlarning barchasi ovqatlanish uchun sarflanmagan va bunda ovqatlanishda na Samarqand viloyati hokimi E.Turdimov, na Vazirlar Kengashining Raisi Q.Sariyev qatnashgan. Ya’ni, qarorda umumiy qilib keltirib o‘tilgan, negizida ovqatlanishi uchun 42 million 570 ming so‘m, sahna bezaklari uchun 19 million 337 ming so‘m, led ekranlari uchun 12 million, transport vositalari uchun 14 million so‘m xarajatlari ishlatilgan, — deyiladi Vazirlar Kengashi axborot xizmati xabarida.Vazirlar Kengashi axborot xizmati shuningdek, maqolani chiqarishdan avval chuqur o‘rganishni, Samarqand va Qaroqalpog‘iston xalqlari o‘rtasida xafagarchilik xissini uyg‘otishi kuzatilayotganini ta’kidlagan.
“Daryo” tahririyati shu o‘rinda mas’ullarning bu e’tiroziga javoban shuni ma’lum qiladiki, maqola e-qaror.gov.uz’da keltirilgan axborot bo‘yicha tayyorlangan. Shu sabab e-qaror.gov.uz’ga axborot kiritishda diqqatliroq bo‘lishni, mazkur tarmoqqa joylashgan har bir farmoyish va qaror jamoatchlikka ko‘rinib turishini eslatib o‘tadi.
Izoh (0)