“Kambag‘allar soni ikki baravar kamayadi”. Jamshid Qo‘chqorov O‘zbekiston aholisini kelasi 5 yilda nimalar kutayotganini aytdi

O‘zbekiston aholisini kelgusi besh yil ichida bir qator o‘zgarishlar kutmoqda. Bu haqda Bosh vazir o‘rinbosari – iqtisodiy taraqqiyot va kambag‘allikni qisqartirish vaziri Jamshid Qo‘chqorov Samarqand shahrida bo‘lib o‘tayotgan iqtisodiy forumining yopilish marosimida aytib o‘tdi, deya xabar bermoqda “Daryo” muxbiri.

Jamshid Qo‘chqorovning ta’kidlashicha, O‘zbekiston 5 yil ichida yashil iqtisodiyot rivojlangan davlatga aylanadi.

Bu davrda elektr ishlab chiqarish stansiyalarini yashil energiya manbalariga almashtiramiz. Banklardan faqat bittasi davlat banki bo‘lib qoladi. Qolganlari xususiy bo‘ladi.

O‘zbekiston rivojlanish strategiyasida ko‘p masalalar aks ettirilgan. Har bir yo‘nalish tarifi berilgan. Muayan maqsadlar belgilangan.

Misol uchun, iqtisodchi sifatida biz yalpi ichki mahsulotga qaraymiz. Hozir O‘zbekiston yalpi ichki mahsuloti 60 milliard dollarni tashkil qiladi. Kelasi 5 yil ichida mamlakatda kambag‘allar soni 2 baravar kamayadi. Daromad jon boshiga 2 ming 800 dollarni tashkil qiladi.

Bu chiroyli raqam bo‘lgani uchun emas, biz umid qilamizki, bu yil YIM jon boshiga ulushi ikki ming dollardan oshadi. Biz qattiq ishlayapmiz. Aholi kuchli mehnat qilmoqda. YIMning 5 yilda jon boshiga 2 ming 800 dollarga yetishi yaxshi natija. Undan keyin 4 ming dollarga yetishga harakat bo‘ladi.

“Bu yil biz 5 foizdan yuqori bo‘lgan iqtisodiy o‘sishni prognoz qilyapmiz. Yil boshidan beri ichki mahsulot 5,8 foizga o‘sdi. Pandemiyadan keyingi vaziyat va global tangliklarda O‘zbekiston rahbariyati doimiy ravishda islohotlarni davom ettirishning qattiq tarafdori bo‘ldi. Yil boshidan beri qishloq xo‘jaligi sektori 3,6 foizga o‘sdi. Bu juda yaxshi ko‘rsatkich. Biz bozorni erkinlashtirishga qaror qildik. 100 ming gektar qishloq xo‘jaligi yerlarini uzoq muddatga lizinga taqdim etdik. O‘zbekistonga chet eldan naqd pul o‘tkazmalari o‘sdi va xizmatlar sektori ham yaxshi o‘sib bormoqda. Menimcha, bular iqtisodiy o‘sishimizni ta’minlovchi asosiy omillar bo‘lmoqda”, – degan edi vazir.