Erkinjon Turdimov boshchiligidagi delegatsiyaning Qoraqalpog‘istondagi bir kunlik kechki ovqati qariyb 88 mln so‘mga tushdi
Samarqand viloyati hokimi Erkinjon Turdimov boshchiligidagi delegatsiyaning Qoraqalpog‘istonga tashrifi paytidagi kechki ovqati respublika budjeti uchun salkam 88 million so‘mga tushgan.
Samarqand viloyati hokimligi axborot xizmatining ma’lumot berishicha, Samarqand viloyati hokimi ham boshqa viloyat rahbarlari kabi Qoraqalpog‘iston Respublikasining Nukus tumaniga biriktirilgan bo‘lib, o‘z tajribasi asosida hududni yanada rivojlantirishga ko‘maklashmoqda.
Nukus tumanini 2022—2024-yillarda ijtimoiy-iqtisodiy rivojlantirish, aholi salomatligini saqlash, qurilish-bunyodkorlik ishlari, yangi korxonalarni ishga tushirish va ish o‘rinlari yaratish uchun Samarqand viloyati tomonidan 898,5 milliard so‘mlik loyihalar ishlab chiqilgan.
Mazkur tashabbus asosida o‘sha kuni qiymati 7,2 milliard so‘m bo‘lgan Xotira maydoni, 52 milliard so‘mlik loyiha asosida barpo etilgan yirik savdo majmuasini o‘z ichiga olgan “Dehqon bozori” foydalanishga topshirilgan.
Qoraqalpog‘iston Respublikasi Vazirlar Kengashining 2-noyabrdagi farmoyishidan anglashilishicha, Erkinjon Turdimov boshchiligidagi delegatsiyaning Nukus tumaniga safarida mehmonlarning kechki ovqatiga sarflangan mablag‘lar 87 million 907 ming 898 so‘mni tashkil qilgan.
Farmoyishga ko‘ra, mazkur mablag‘lar Vazirlar Kengashining zaxira fondi hisobidan ajratilgan bo‘lib, mablag‘larni maqsadli sarflash Nukus tumani hokimi O‘mirbay Usnatdinovga yuklatilgan.
