O‘zbekiston banklari Rossiyaning MIR kartalarini qabul qilishni qayta tiklashga tayyor emas. Bu haqda Markaziy bank boshqaruvi raisi Mamarizo Nurmuratov Samarqandda bo‘lib o‘tgan iqtisodiy forum paytida ma’lum qildi.
Nurmuratovning so‘zlariga ko‘ra, ayni paytda banklar tizimida MIR kartalariga xizmat ko‘rsatishda “katta xavflar” mavjud.
Shu bilan birga, u Rossiya va O‘zbekiston rossiyaliklar uchun naqd pulsiz to‘lovlarni osonlashtirish ustida ish olib borayotganini aytdi. Xususan, rossiyaliklar O‘zbekistonga kelishidan oldin ham so‘m sotib olishlari mumkin bo‘lgan mexanizm yaratish mumkin.
Joriy yilning mart oyida UzCard texnik sabablarga ko‘ra MIR kartalariga xizmat ko‘rsatishni to‘xtatib qo‘ygan edi. Keyinchalik 1-avgustdan MIR kartalaridan pul o‘tkazmalari qayta tiklangan.
23-sentabr kuni Uzcard texnik sabablarga ko‘ra MIR kartalariga xizmat ko‘rsatish to‘xtatilganini ma’lum qildi.
Avvalroq O‘zbekistonda MIR kartalariga xizmat ko‘rsatilmayotgani haqida xabarlar tarqalgan edi. AQSH MIR kartalari tufayli xorijiy banklar uchun sanksiyalar xavfini e’lon qilgan.
Buning ortidan Turkiyaning ikkita yirik banki MIR kartalari bilan operatsiyalarni to‘xtatgan edi. Keyinchalik Qozog‘iston va Vyetnam banklari ham MIR kartalariga xizmat ko‘rsatmasligini ma’lum qilgan.
Izoh (0)