Ўзбекистонда МИР карталарига хизмат кўрсатишни қайта тиклаш режалаштирилмаяпти
Ўзбекистон банклари Россиянинг МИР карталарини қабул қилишни қайта тиклашга тайёр эмас. Бу ҳақда Марказий банк бошқаруви раиси Мамаризо Нурмуратов Самарқандда бўлиб ўтган иқтисодий форум пайтида маълум қилди.
Нурмуратовнинг сўзларига кўра, айни пайтда банклар тизимида МИР карталарига хизмат кўрсатишда «катта хавфлар» мавжуд.
Шу билан бирга, у Россия ва Ўзбекистон россияликлар учун нақд пулсиз тўловларни осонлаштириш устида иш олиб бораётганини айтди. Хусусан, россияликлар Ўзбекистонга келишидан олдин ҳам сўм сотиб олишлари мумкин бўлган механизм яратиш мумкин.
Жорий йилнинг март ойида УзCarд техник сабабларга кўра МИР карталарига хизмат кўрсатишни тўхтатиб қўйган эди. Кейинчалик 1 августдан МИР карталаридан пул ўтказмалари қайта тикланган.
23 сентябрь куни Uzcard техник сабабларга кўра МИР карталарига хизмат кўрсатиш тўхтатилганини маълум қилди.
Аввалроқ Ўзбекистонда МИР карталарига хизмат кўрсатилмаётгани ҳақида хабарлар тарқалган эди. АҚШ МИР карталари туфайли хорижий банклар учун санкциялар хавфини эълон қилган.
Бунинг ортидан Туркиянинг иккита йирик банки МИР карталари билан операцияларни тўхтатган эди. Кейинчалик Қозоғистон ва Вьетнам банклари ҳам МИР карталарига хизмат кўрсатмаслигини маълум қилган.
