Фарғонада профилактика инспекторининг автомашинаси ойнасини тепиб синдириб, унга пичоқ ўқталган ва тан жароҳати етказган шахсга нисбатан жиноят иши қўзғатилди. Бу ҳақда «Дарё»га вилоят ИИБ ахборот хизмати маълум қилди.
Қайд этилишича, жорий йилнинг 27 октябрь куни Қўқон шаҳар Муқимий шаҳарчасида яшовчи фуқаро 102 қисқа рақами орқали мурожаат қилиб, фарзандининг уяли телефонини номаълум шахс фойдаланиш учун сўраб олиб, қайтариб бермасдан кетиб юборганини маълум қилган.
Мазкур мурожаат юзасидан ушбу ҳудуд профилактика инспектори томонидан терговга қадар текширув ҳаракатлари олиб борилган. Суриштирув давомида телефон аппарати шаҳарнинг 1-тор кўчасида яшовчи вояга етмаган Ў.А. томонидан олиб кетилгани аниқланган.
29 октябрь куни профилактика инспектори гумонланувчи билан кўришган вақтда у ходимнинг қонуний талабларига бўйсунмасдан турли ноўрин сўзлар билан ҳақорат қилган. Шундан сўнг, қўлидаги пичоқни профилактика инспекторига ўқталиб, автомашинасининг олд ён ойнасини тепиб синдирган. Автомашина ён ойнасининг синиши натижасида профилактика инспектори юз соҳасидан тан жароҳати олган.
Мазкур ҳолат юзасидан Ў.А. га нисбатан Жиноят кодексининг 168, 219-моддалари (ҳокимият вакилига ёки фуқаровий бурчини бажараётган шахсга қаршилик кўрсатиш) билан жиноят иши қўзғатилиб, гумонланувчи процессуал тартибда ушланган.
Ҳозирда мазкур ҳолат юзасидан тергов ҳаракатлари олиб борилмоқда.
Изоҳ (0)