“Daryo” nashri 1-noyabrda O‘zbekiston va jahonda sodir bo‘lgan eng muhim voqealarni e’tiboringizga havola etadi.
Putin Ukrainadagi obyektlarga zarbalar Sevastopoldagi teraktga javob bo‘lganini aytdi
Ukrainadagi energetika obyektlariga zarbalar “qisman” Sevastopoldagi teraktga javob hisoblanadi. Bu haqda Rossiya prezidenti Vladimir Putin Armaniston va Ozarbayjon yetakchilari bilan muzokaralardan keyin tashkil etilgan matbuot anjumanida ma’lum qildi.
“Qisman shunday. Ammo bu biz qilishimiz mumkin bo‘lgan narsalarning hammasi emas”, — dedi Putin 31-oktabr kuni Ukraina hududidagi obyektlarga zarbalarni Ukraina qurolli kuchlarining Sevastopoldagi hujumlariga javob deb hisoblash mumkinmi? — degan savolga javoban.
29-oktabrga o‘tar kechasi Ukraina qurolli kuchlari havo va dengiz dronlari Sevastopol ko‘rfazida Qora dengiz floti va fuqarolik kemalariga hujum qildi. Shahar gubernatori Mixail Razvojayev dronlarning barchasi yo‘q qilinganini, fuqarolik infratuzilmasiga zarar yetmaganini va jabrlanganlar yo‘qligini bildirdi. Shu bilan birga, Rossiya Mudofaa vazirligi “Ivan Golubets” kemasi zarar ko‘rganini ma’lum qildi.
Shuningdek, muassasaga ko‘ra, dronlar hujumiga uchragan kemalar “don bitimi” doirasida dengiz yo‘lagi xavfsizligini ta’minlashda ishtirok etgan. Shundan keyin Rossiya ushbu bitimdagi ishtirokini to‘xtatishga qaror qildi.
Ayni vaziyatda Putin Rossiya Ukraina bilan muzokaralar borasida o‘z pozitsiyasini o‘zgartirmasligini aytgan
Rossiyaning Kiyev bilan muzokaralar bo‘yicha pozitsiyasi ikkilanishlar va o‘zgarishlarga uchramaydi, Moskva muloqot davom ettirilishini kutmoqda, degan Rossiya prezidenti
“Nuqta qo‘yilgan”. Kreml safarbarlikni yakunlash uchun prezident farmoni shart emasligini ma’lum qildi
Rossiya prezidentining matbuot kotibi Dmitriy Peskov Rossiyada “qisman safarbarlik”ni yakunlash uchun prezidentning maxsus farmoni shart emasligini aytdi. Bu haqda Meduza xabar bermoqda.
Sizga shuni ma’lum qilamizki, farmonga ehtiyoj yo‘q, bizda bu borada prezident administratsiyasi davlat-huquqiy boshqarmasining xulosasi bor. Shunga ko‘ra, nuqta qo‘yildi, qisman safarbarlik tugatildi. Mudofaa vazirligi tomonidan harbiy komissarliklarga safarbarlik to‘xtatilgani, bundan keyin hech qanday chaqiruv qog‘ozi yubormaslik va hokazolar yuzasidan tegishli telegrammalar yuborilgan, — dedi Peskov.
“Qisman safarbarlik” to‘g‘risidagi tegishli farmon o‘z kuchida qoladimi va uning asosida Rossiya hukumati safarbarlikning yangi bosqichini boshlashi mumkinmi, degan aniqlashtiruvchi savolga javob berar ekan, Peskov shunday dedi: “Yo‘q, axir u yerda raqamlar (safarbar qilinadiganlar soni) qat’iy belgilangan — mos ravishda 300 ming kishigacha deyilgan, bu farmonning ijrosi ta’minlandi”.
31-oktabr kuni Rossiya Mudofaa vazirligi chaqiruv qog‘ozlari yuborishni to‘xtatishini e’lon qilgandi. Mudofaa vaziri Sergey Shoygu Rossiya rahbari Putinga safarbarlik tadbirlari tugagani haqida 28-oktabr kuni hisobot bergan.
Shoyguning bayonotlariga qaramay, Rossiyaning turli hududlaridan odamlarga chaqiruv qog‘ozlari kelishda davom etayotgani haqida xabarlar kelib tushgan. Putinning matbuot kotibi Dmitriy Peskov buni harbiy komissariatlarning “muayyan inersiyasi” bilan izohlagan edi.
Britaniya razvedkasi: Rossiya “Kinjal” raketalarini Belarusga joylashtirgan bo‘lishi mumkin
Belarus poytaxti Minsk ostonalaridagi Machulishchi aerodromida Rossiyaning ikkita MiG-31 samolyotlari va bir konteyner qayd etilgan, u, katta ehtimol bilan, “Kinjal” gipertovushli raketalarni saqlash uchun qo‘llaniladi. Bu haqda Buyuk Britaniya razvedkasi 1-noyabr kuni e’lon qilgan hisobotda aytiladi.
Hisobotda 17-oktabr kuni olingan, Rossiya qiruvchisi aks etgan suratni ham e’lon qildi. Unda ikkita MiG-31 samolyotini hamda Kinjal raketalari bor deb taxmin etilayotgan, tuproq devor bilan to‘silgan katta konteynerni ko‘rish mumkin.
Bu raketalarni Rossiya 2018-yildan buyon qo‘llab keladi, ammo shu paytgacha ularni Belarusga joylashtirmagan edi. Rossiya “Kinjal” raketalaridan Ukrainaga qarshi urushda foydalangan, ammo ularning zaxiralari cheklangan bo‘lishi mumkin.
Razvedkachilar fikricha, “Kinjal”lar Belarusga 2000 km masofaga joylashtirilgani tufayli, ular Rossiya uchun Ukrainaga qarshi urushda ko‘p imtiyoz bermaydi.
Moskva bu raketalarni G‘arbga signal berish va Belarusni urushdagi sherigi sifatida namoyish qilish uchun u yerga joylashtirgan bo‘lishi ham mumkin, deydi Britaniya razvedkasi.
Shimoliy Koreya AQSHni yadroviy urushga tayyorgarlik ko‘rishda aybladi
Janubiy Koreya va AQSHning muntazam harbiy mashg‘ulotlari fonida Shimoliy Koreya Tashqi ishlar vazirligi Vashingtonni KXDRga qarshi yadro urushiga tayyorgarlik ko‘rayotganlikda va Koreya yarimorolidagi vaziyatni atay keskinlashtirishda aybladi. Bu haqda Shimoliy Koreya markaziy telegraf agentligiga tayanib, “RIA Novosti” xabar berdi.
Pxenyan AQSHning KXDRga nisbatan Koreya yarim orolidagi vaziyatni keskinlashtirish bo‘yicha ayblovlarini “bema’ni” deb hisoblamoqda. “Agar AQSH baribir jiddiy harbiy provokatsiyaga qo‘l ursa, biz yanada jiddiyroq javob choralarini ko‘rib chiqamiz”, — deya so‘zini yakunladi Shimoliy Koreya TIV vakili.
Avvalroq AQSH va Janubiy Koreya qariyb besh yil ichida birinchi keng ko‘lamli qo‘shma Vigilant Storm havo mashg‘ulotlarini boshlagan edi.
Ushbu mashg‘ulotlar Shimoliy Koreya tomonidan bir qator raketalar uchirilganidan so‘ng, qolaversa, Pxenyan yaqin orada yadroviy sinov o‘tkazishi mumkinligi haqidagi xavotirlar fonida amalga oshirilmoqda.
“Qisman mobilizatsiya e’lon qilinsa, vatanni tashlab ketayotgan yuz minglab erkaklar holati masalani jiddiy ekanini yana bir marta ko‘rsatyapti” — Iqbol Mirzo maktablarda CHYT fanini o‘qitish haqida
1-noyabr kuni bo‘lib o‘tgan Oliy Majlis Qonunchilik palatasining navbatdagi yig‘ilishida Xalq ta’limi vaziri tomonidan parlament so‘roviga yuborgan javobi ko‘rib chiqildi. Unda yoshlarni harbiy vatanparvarlik ruhida tarbiyalash, shu jumladan, o‘rta ta’lim maktablarida chaqiruvga qadar boshlang‘ich tayyorgarlik fanini o‘qitish borasida amalga oshirilayotgan ishlar to‘g‘risida ma’lumot taqdim etilgan.
Yig‘ilishda mazkur masala yuzasidan Qonunchilik palatasining Fan, ta’lim, madaniyat va sport masalalari qo‘mitasi raisi o‘rinbosari Iqbol Mirzo fikr bildirdi:
Men o‘ta jiddiy masalaga diqqatlaringizni tortishni istardim. Biz Mudofaa vazirligi huzuridagi jamoatchilik kengashida faoliyat olib borgan paytimizda aynan shu masalani ko‘p o‘rganganmiz. Chunki vatanning mudofaasi maktabdagi tarbiya bilan bog‘liq bo‘ladi.
Maktablarimizda 5-6 yil oldin sharoitlar juda yomon edi, lekin hali ham keskin yaxshilangani yo‘q. Prezidentimiz — Oliy bosh qo‘mondon katta islohotlarni qilib berdilar. Ayniqsa, mutaxassis o‘qituvchilar yetishmasdi. O‘qituvchilarda oylik masalasida ham muammolar bor edi.
Harbiy xizmatdan bo‘shagan ofitserlarni dars berishga jalb qilish to‘g‘ri yechim bo‘ldi. Lekin hali ham bor-yo‘g‘i 3 foiz maktablarimizda o‘quv mashq miltiqlari bor.
Qisqa qilib aytadigan bo‘lsam, ushbu masalaga jiddiy qarab, nazoratini olib borish kerak. Amir Temurning mashhur gaplari bor: “Agar tinchlikni istasang, urushga tayyor tur”. Bugun sobiq sho‘ro hududida bo‘layotgan voqealar qisman mobilizatsiya e’lon qilinsa, vatanni tashlab ketayotgan yuz minglab erkaklar holati masalani jiddiy ekanini yana bir marta ko‘rsatyapti.
Oliy Majlis Qonunchilik palatasining spikeri Nurdinjon Ismoilovning aytishicha, ushbu masala parlament tarixida birinchi marotaba ko‘tarilmoqda.
Izoh (0)