«Дарё» нашри 1 ноябрда Ўзбекистон ва жаҳонда содир бўлган энг муҳим воқеаларни эътиборингизга ҳавола этади.
Путин Украинадаги объектларга зарбалар Севастополдаги терактга жавоб бўлганини айтди
Украинадаги энергетика объектларига зарбалар «қисман» Севастополдаги терактга жавоб ҳисобланади. Бу ҳақда Россия президенти Владимир Путин Арманистон ва Озарбайжон етакчилари билан музокаралардан кейин ташкил этилган матбуот анжуманида маълум қилди.
«Қисман шундай. Аммо бу биз қилишимиз мумкин бўлган нарсаларнинг ҳаммаси эмас», — деди Путин 31 октябрь куни Украина ҳудудидаги объектларга зарбаларни Украина қуролли кучларининг Севастополдаги ҳужумларига жавоб деб ҳисоблаш мумкинми? — деган саволга жавобан.
29 октябрга ўтар кечаси Украина қуролли кучлари ҳаво ва денгиз дронлари Севастопол кўрфазида Қора денгиз флоти ва фуқаролик кемаларига ҳужум қилди. Шаҳар губернатори Михаил Развожаев дронларнинг барчаси йўқ қилинганини, фуқаролик инфратузилмасига зарар етмаганини ва жабрланганлар йўқлигини билдирди. Шу билан бирга, Россия Мудофаа вазирлиги «Иван Голубец» кемаси зарар кўрганини маълум қилди.
Шунингдек, муассасага кўра, дронлар ҳужумига учраган кемалар «дон битими» доирасида денгиз йўлаги хавфсизлигини таъминлашда иштирок этган. Шундан кейин Россия ушбу битимдаги иштирокини тўхтатишга қарор қилди.
Айни вазиятда Путин Россия Украина билан музокаралар борасида ўз позициясини ўзгартирмаслигини айтган
Россиянинг Киев билан музокаралар бўйича позицияси иккиланишлар ва ўзгаришларга учрамайди, Москва мулоқот давом эттирилишини кутмоқда, деган Россия президенти
«Нуқта қўйилган». Кремль сафарбарликни якунлаш учун президент фармони шарт эмаслигини маълум қилди
Россия президентининг матбуот котиби Дмитрий Песков Россияда «қисман сафарбарлик»ни якунлаш учун президентнинг махсус фармони шарт эмаслигини айтди. Бу ҳақда Meduza хабар бермоқда.
Сизга шуни маълум қиламизки, фармонга эҳтиёж йўқ, бизда бу борада президент администрацияси давлат-ҳуқуқий бошқармасининг хулосаси бор. Шунга кўра, нуқта қўйилди, қисман сафарбарлик тугатилди. Мудофаа вазирлиги томонидан ҳарбий комиссарликларга сафарбарлик тўхтатилгани, бундан кейин ҳеч қандай чақирув қоғози юбормаслик ва ҳоказолар юзасидан тегишли телеграммалар юборилган, — деди Песков.
«Қисман сафарбарлик» тўғрисидаги тегишли фармон ўз кучида қоладими ва унинг асосида Россия ҳукумати сафарбарликнинг янги босқичини бошлаши мумкинми, деган аниқлаштирувчи саволга жавоб берар экан, Песков шундай деди: «Йўқ, ахир у ерда рақамлар (сафарбар қилинадиганлар сони) қатъий белгиланган — мос равишда 300 минг кишигача дейилган, бу фармоннинг ижроси таъминланди».
31 октябрь куни Россия Мудофаа вазирлиги чақирув қоғозлари юборишни тўхтатишини эълон қилганди. Мудофаа вазири Сергей Шойгу Россия раҳбари Путинга сафарбарлик тадбирлари тугагани ҳақида 28 октябрь куни ҳисобот берган.
Шойгунинг баёнотларига қарамай, Россиянинг турли ҳудудларидан одамларга чақирув қоғозлари келишда давом этаётгани ҳақида хабарлар келиб тушган. Путиннинг матбуот котиби Дмитрий Песков буни ҳарбий комиссариатларнинг «муайян инерсияси» билан изоҳлаган эди.
Британия разведкаси: Россия «Кинжал» ракеталарини Беларусга жойлаштирган бўлиши мумкин
Беларусь пойтахти Минск остоналаридаги Мачулишчи аэродромида Россиянинг иккита МиГ-31 самолётлари ва бир контейнер қайд этилган, у, катта эҳтимол билан, «Кинжал» гипертовушли ракеталарни сақлаш учун қўлланилади. Бу ҳақда Буюк Британия разведкаси 1 ноябрь куни эълон қилган ҳисоботда айтилади.
Ҳисоботда 17 октябрь куни олинган, Россия қирувчиси акс этган суратни ҳам эълон қилди. Унда иккита МиГ-31 самолётини ҳамда Кинжал ракеталари бор деб тахмин этилаётган, тупроқ девор билан тўсилган катта контейнерни кўриш мумкин.
Бу ракеталарни Россия 2018 йилдан буён қўллаб келади, аммо шу пайтгача уларни Беларусга жойлаштирмаган эди. Россия «Кинжал» ракеталаридан Украинага қарши урушда фойдаланган, аммо уларнинг захиралари чекланган бўлиши мумкин.
Разведкачилар фикрича, «Кинжал»лар Беларусга 2000 км масофага жойлаштирилгани туфайли, улар Россия учун Украинага қарши урушда кўп имтиёз бермайди.
Москва бу ракеталарни Ғарбга сигнал бериш ва Беларусни урушдаги шериги сифатида намойиш қилиш учун у ерга жойлаштирган бўлиши ҳам мумкин, дейди Британия разведкаси.
Шимолий Корея АҚШни ядровий урушга тайёргарлик кўришда айблади
Жанубий Корея ва АҚШнинг мунтазам ҳарбий машғулотлари фонида Шимолий Корея Ташқи ишлар вазирлиги Вашингтонни КХДРга қарши ядро урушига тайёргарлик кўраётганликда ва Корея яриморолидаги вазиятни атай кескинлаштиришда айблади. Бу ҳақда Шимолий Корея марказий телеграф агентлигига таяниб, «РИА Новости» хабар берди.
Пхеньян АҚШнинг КХДРга нисбатан Корея ярим оролидаги вазиятни кескинлаштириш бўйича айбловларини «бемаъни» деб ҳисобламоқда. «Агар АҚШ барибир жиддий ҳарбий провокацияга қўл урса, биз янада жиддийроқ жавоб чораларини кўриб чиқамиз», — дея сўзини якунлади Шимолий Корея ТИВ вакили.
Аввалроқ АҚШ ва Жанубий Корея қарийб беш йил ичида биринчи кенг кўламли қўшма Вигилант Сторм ҳаво машғулотларини бошлаган эди.
Ушбу машғулотлар Шимолий Корея томонидан бир қатор ракеталар учирилганидан сўнг, қолаверса, Пхеньян яқин орада ядровий синов ўтказиши мумкинлиги ҳақидаги хавотирлар фонида амалга оширилмоқда.
«Қисман мобилизация эълон қилинса, ватанни ташлаб кетаётган юз минглаб эркаклар ҳолати масалани жиддий эканини яна бир марта кўрсатяпти» — Иқбол Мирзо мактабларда ЧЙТ фанини ўқитиш ҳақида
1 ноябрь куни бўлиб ўтган Олий Мажлис Қонунчилик палатасининг навбатдаги йиғилишида Халқ таълими вазири томонидан парламент сўровига юборган жавоби кўриб чиқилди. Унда ёшларни ҳарбий ватанпарварлик руҳида тарбиялаш, шу жумладан, ўрта таълим мактабларида чақирувга қадар бошланғич тайёргарлик фанини ўқитиш борасида амалга оширилаётган ишлар тўғрисида маълумот тақдим этилган.
Йиғилишда мазкур масала юзасидан Қонунчилик палатасининг Фан, таълим, маданият ва спорт масалалари қўмитаси раиси ўринбосари Иқбол Мирзо фикр билдирди:
Мен ўта жиддий масалага диққатларингизни тортишни истардим. Биз Мудофаа вазирлиги ҳузуридаги жамоатчилик кенгашида фаолият олиб борган пайтимизда айнан шу масалани кўп ўрганганмиз. Чунки ватаннинг мудофааси мактабдаги тарбия билан боғлиқ бўлади.
Мактабларимизда 5-6 йил олдин шароитлар жуда ёмон эди, лекин ҳали ҳам кескин яхшилангани йўқ. Президентимиз — Олий бош қўмондон катта ислоҳотларни қилиб бердилар. Айниқса, мутахассис ўқитувчилар етишмасди. Ўқитувчиларда ойлик масаласида ҳам муаммолар бор эди.
Ҳарбий хизматдан бўшаган офицерларни дарс беришга жалб қилиш тўғри ечим бўлди. Лекин ҳали ҳам бор-йўғи 3 фоиз мактабларимизда ўқув машқ милтиқлари бор.
Қисқа қилиб айтадиган бўлсам, ушбу масалага жиддий қараб, назоратини олиб бориш керак. Амир Темурнинг машҳур гаплари бор: «Агар тинчликни истасанг, урушга тайёр тур». Бугун собиқ шўро ҳудудида бўлаётган воқеалар қисман мобилизация эълон қилинса, ватанни ташлаб кетаётган юз минглаб эркаклар ҳолати масалани жиддий эканини яна бир марта кўрсатяпти.
Олий Мажлис Қонунчилик палатасининг спикери Нурдинжон Исмоиловнинг айтишича, ушбу масала парламент тарихида биринчи маротаба кўтарилмоқда.
Изоҳ (0)