Harbiy qurilmalar ortilgan “Soyuz-2.1b” eltuvchi raketasi Rossiyaning Arxangelsk viloyatidagi Plesesk kosmodromidan uchirildi. Bu haqda Rossiya Mudofaa vazirligi xabar berdi.
“Harbiy-kosmik kuchlar kosmik qo‘shinlarining jangovar guruhlari tomonidan Rossiya Mudofaa vazirligi manfaatlarida kosmik qurilma ortilgan ‘Soyuz-2.1b” o‘rta sinf eltuvchi raketasi uchirildi”, — deyiladi xabarda.
Bu so‘nggi bir oy ichida Pleseskdan harbiy sun’iy yo‘ldoshlar bilan birga uchirilgan uchinchi raketadir.
Avvalroq, 21-oktabr kuni Rossiya Mudofaa vazirligi Pleseskdan ikkita harbiy sun’iy yo‘ldosh ortilgan “Soyuz-2.1v” eltuvchi rajetasi uchirilgani haqida xabar bergandi.
15-oktabr kuni “Angara-1.2” eltuvchi raketasi parvozi amalga oshirilgan. Keyinroq Mudofaa vazirligi gap harbiy sun’iy yo‘ldosh haqida borayotganini ma’lum qilgan.
10-oktabr kuni ham Pleseskdan “Soyuz-2.1b” uchirilgan, u orbitaga “GLONASS-K” navigatsion kosmik qurilmasini olib chiqqan.
Avvalroq Buyuk Britaniya mudofaa shtabi boshlig‘i Entoni Radakin Rossiya kosmik texnologiyalar yordamida G‘arb mamlakatlariga qarshi harbiy harakatlar olib borishi mumkinligini aytgandi.
Shu yilning iyun oyida Rossiyaning Ukrainadagi jangovar harakatlari fonida “Roskosmos” rahbari Dmitriy Rogozin butun kosmik qurilmalar resursi Mudofaa vazirligi manfaatlariga jalb etilganini ma’lum qilgandi. Orbitada 160 dan ortiq harbiy va fuqarolik sun’iy yo‘ldoshlari bor, degan edi u.
Undan avvalroq Rossiya Ukrainadagi harbiy harakatlarni kuzatib borish uchun mingta sun’iy yo‘ldoshni ishga tushirishi ma’lum qilingandi.
Izoh (0)