Pashinyan: “Rossiya Qorabog‘ masalasini keyinga qoldirishni taklif qildi, Armaniston bunga rozi”

Rossiya Tog‘li Qorabog‘ maqomi masalasini keyinga qoldirishni taklif qilgan, Armaniston esa bunday yondashuvga rozi. Bu haqda respublika bosh vaziri Nikol Pashinyan ma’lum qildi.

“Bu shu bilan asoslanadiki, hozir ikkala tomon uchun ham o‘zaro maqbul bo‘lishi mumkin bo‘lgan maqomni topish ilojsiz. Armaniston hukumati siyosati bu konsepsiyaga qanchalik to‘g‘ri keladi? To‘liq va 100%”, — deya ta’kidladi hukumat rahbari.

Avvalroq u G‘arbning Armaniston-Ozarbayjon masalasi bo‘yicha takliflarini maqbul deb atagandi. “Variantlardan biri bo‘yicha Tog‘li Qorabog‘ masalasiga to‘xtalib qolmaslik, balki hozirgi holatni ma’lum bir status-kvo ko‘rinishida qayd etib, Armaniston-Ozarbayjon masalasini hal qilish taklif etilmoqda. Bu maqbul variant”, — degandi Pashinyan.

31-oktabr kuni Sochida Pashinyan bilan Ozarbayjon va Rossiya prezidentlari Ilhom Aliyev va Vladimir Putin o‘rtasida uchrashuv bo‘lib o‘tdi. Putin bilan muzokaralardan avval Pashinyan Rossiyaning Tog‘li Qorabog‘dagi vaziyatni tartibga solish bo‘yicha takliflariga Yerevan rozi ekanligini aytgandi.

Armaniston bosh vaziri Sochidagi uchrashuvda rossiyalik tinchlikparvarlarning Tog‘li Qorabog‘dagi mandatini uzaytirishni taklif qilganini, biroq u rad etilganini aytdi. “Menimcha, masala kun tartibiga kirdi”, — deya qo‘shib qo‘ygandi u.

Putin muzokaralarda Armaniston va Ozarbayjon o‘rtasidagi nizo o‘n yilliklardan buyon davom etayotganini, “shu sababli uni qandaydir qilib yakunlash kerakligi”ni aytdi. U tomonlarni oldinga harakatlantirishda yordam beruvchi asosiy nuqtalarni topishga chaqirdi.

Aliyevning fikricha, Tog‘li Qorabog‘dagi nizo ikki yil avval hal bo‘lgan va bu borada “muhokama qilinadigan deyarli hech narsa yo‘q”, ammo Boku va Yerevan aloqalari esa normallashtirishga muhtoj.