Xitoyda lotereyadan 30 mln dollar yutib olgan erkak buni rafiqasi va farzandidan sir tutmoqda

Xitoy janubida yashovchi erkak 219 million yuan (29,9 million dollar) miqdoridagi lotereya yutug‘ini xotini va farzandidan sir tutmoqda. U pullar oilasini taltaytirib yuborishi mumkinligidan xavotirda.

Nanning Evening News xabar berishicha, o‘zini Li deb tanishtirgan erkak yutuqni olish uchun Guangxi janubidagi Nanning shahridagi lotereya ofisiga yolg‘iz borgan. Mukofotni qabul qilib olayotgan vaqtda u o‘zini ommaga tanitmaslik uchun sariq rangli multiqahramon ko‘rinishida kiyinib olgan.

“Men xotinim va farzandimga yutuq haqida aytmadim, chunki ularning taltayib ketishidan va kelajakda mehnat qilmay qo‘yishidan qo‘rqdim”, — dedi u nashrga.

U 5 million yuanni xayriya ishlariga topshirgani va qolgan pulni nima qilish haqida hali bir qarorga kelmaganini aytdi. Soliqlardan keyin unda 171,6 million yuan qolgan.

Nanning Evening News nashriga ko‘ra, erkak yutuqli chiptani do‘kondan sotib olgan edi.