Maskning loyihasini bajarish uchun Twitter xodimlari 24/7 rejimida ishlashga majbur qilinmoqda — OAV
Ilon Maskning Twitter’dagi birinchi loyihasini shu hafta oxirigacha yakunlash uchun ijtimoiy tarmoq xodimlariga 24/7 rejimida ishlash kerakligi aytilmoqda, aks holda ular ishsiz qolishi mumkin. Bu haqda manbalarga tayanib, New York Post xabar berdi.
O‘tgan hafta Twitter’ni sotib olgan Mask dastlabki qadamlardan biri sifatida tarmoq foydalanuvchilariga verifikatsiya belgisini berish jarayonini qayta ko‘rib chiqishni buyurdi.
Xabar qilinishicha, Mask foydalanuvchilardan Twitter Blue premium obunasi orqali verifikatsiya belgisi uchun oyiga 20 dollar undirishni rejalashtirmoqda.
Ilgari narxi 4,99 dollar bo‘lgan Twitter Blue’ga o‘zgartirishlar ustida ishlashga Twitter’dagi “bir nechta jamoalar” jalb qilingan. Mask o‘z tvitida verifikatsiya “hozirda yangilanayotganini” tan oldi.
“Bu o‘zgarishni Mask so‘radi va u 4-noyabrgacha tayyor bo‘lishi kerak”, — deya Twitter xodimlariga yuborilgan ichki xabardan iqtibos keltirdi Insider nashri. “Ushbu haftada qiladigan eng muhim ishimiz shu bo‘lishi kerak. Buni amalga oshirish uchun 24/7 rejimida ishlash kutilmoqda. Kompaniyadagi har bir funksiya shunday qiladi”.
Nashr ta’kidlashicha, kompaniya ishni yakunlash muddatini 4-noyabr etib belgilagan. Ichki xabarlardan ma’lum bo‘lishicha, Twitter smenalar oralig‘ida loyihani muvofiqlashtirish uchun har 12 soatda hisobot uchrashuvlarini rejalashtirmoqda.
Insider manbalaridan birining aytishicha, loyiha ish masalasida tashvish uyg‘otgan, chunki Mask va uning maslahatchilar jamoasi ijtimoiy media firmasidagi xarajatlarni kamaytirishga intilayotgani sababli, Twitter shu hafta xodimlarini ishdan bo‘shatishni boshlashi kutilmoqda.
