Rossiyada deputatlar safarbarlikdan bo‘yin tovlaganlarni 5 yilga qamashni taklif qildi
Rossiya Davlat Dumasi deputatlari safarbarlik doirasida harbiy xizmatdan bo‘yin tovlaganlik uchun jinoiy javobgarlikni nazarda tutuvchi qonun loyihasini parlamentga kiritishni rejalashtirmoqda. Bu haqda birinchi bo‘lib “Izvestiya” gazetasi Dumadagi manbalarga tayanib xabar qildi. Qonun loyihasi mualliflaridan biri Ernest Valeyev “Interfaks”ga tashabbus tafsilotlarini aytib berdi.
Rossiya Jinoyat kodeksiga taklif etilayotgan o‘zgartishlar safarbarlikdan bo‘yin tovlaganlarni 200 mingdan 500 ming rublgacha yoki bir yildan uch yilgacha bo‘lgan daromadi miqdorida jarimaga tortishni, majburiy mehnat yoki besh yilgacha ozodlikdan mahrum qilish bilan jazolashni nazarda tutadi.
Ernest Valeyevning so‘zlariga ko‘ra, jinoiy javobgarlik harbiy komissariatga rasmiy ravishda chaqiruv qog‘ozini olgandan so‘ng, safarbarlikdan bo‘yin tovlaganlar uchungina qo‘llanadi.
Valeyevning ta’kidlashicha, ushbu qonun loyihasi qonunchilikdagi bo‘shliqni to‘ldiradi: hozirda Rossiya Jinoyat kodeksida faqat muddatli harbiy xizmatga chaqiruvdan bo‘yin tovlaganlik uchun javobgarlik nazarda tutilgan. Deputatning aytishicha, bu tashabbus 21-sentabrda boshlangan “qisman safarbarlik”ga ta’sir qilmaydi, “chunki safarbarlik yakunlangani rasman e’lon qilingan”.
