“Daryo” kundaligida 31-oktabrda sodir bo‘lgan eng muhim voqealar
“Daryo” nashri 31-oktabrda O‘zbekiston va jahonda sodir bo‘lgan eng muhim voqealarni e’tiboringizga havola etadi.
Kiyev, Xarkov va Zaporojyega ketma-ket zarbalar berildi.
Kiyevda ketma-ket portlashlar sodir bo‘ldi, Bu haqda UNIAN va “Strana.ua” xabar bermoqda.
Kiyev meri Vitaliy Klichko muhim infratuzilma obyektlari portlaganini tasdiqladi. “Poytaxtning bir qismi elektr ta’minotidan uzilib qoldi. Ba’zi tumanlarda suv ta’minoti yo‘q. Barcha xizmatlar ishlamoqda”, — dedi u.
Kiyev osmonida Rossiya raketasining urib tushirilishi: Kiyev viloyatida havo trevogasi e’lon qilindi. Havo hujumiga qarshi mudofaa tizimi ishlamoqda.
Shuningdek, bir qancha portlashlar Zaporojyeda ham yuz bergan.
Xarkovga ham zarbalar berilgani ma’lum qilindi. Mer Igor Terexovning so‘zlariga ko‘ra, ikkita zarba muhim infratuzilma obyektiga kelib tekkan.
Vinnitsa viloyatida Rossiyaning urib tushirilgan raketasi fuqarolik obyektlariga qulagan, vayronagarchiliklar bor.
Ukrainaning Cherkassi viloyatigi muhim infratuzilma obyekti zarbaga uchragan, hududning bir qismi elektr tokidan uzilgan, deya ma’lum qildi gubernator Igor Taburets.
Infratuzilma obyektlariga berilgan zarbalardan keyin Ukrainada temir yo‘l liniyalarining bir qismi tokdan uzilib qoldi. Yo‘nalishlarga teplovozlar chiqarildi.
Kiyevdagi portlashlar fonida Chexiya bosh vaziri rahbarligidagi delegatsiya shaharga keldi
Uchrashuvda Ukrainaning urushdan keyingi tiklanishi va Chexiyadagi ukrainalik qochqinlar bilan bog‘liq muammolar muhokama qilindi, deb yozadi telekanal Lipavskiyning bayonotiga tayanib. Uning so‘zlariga ko‘ra, muzokaralar mavzularidan biri Ukrainaning Yevropa Ittifoqiga integratsiyalashuvini qo‘llab-quvvatlash bo‘lmoqda.
Finlyandiya NATOga Rossiya bilan chegaraga yadro quroli joylashtirishga ruxsat beradi — OAV
Finlyandiyaning NATOga qo‘shilish haqidagi arizasi ratifikatsiya qilinsa, mamlakat alyansga Rossiya bilan chegaraga yadro quroli joylashtirishga ruxsat berishi mumkin. Bu haqda Finlyandiya matbuotiga tayanib, Newsweek xabar berdi.
Nashr qayd etishicha, bunday shakldagi bayonot shuni bildiradiki, NATOning yadro quroli Finlyandiya hududi orqali o‘tishi va hatto u yerga joylashtirilishi ham mumkin.
Ayni paytda Finlyandiyaning Rossiya bilan chegaralariga yadro quroli joylashtirilishi ehtimoli hukumat tomonidan rasman tasdiqlanganicha yo‘q.
Bayraktar dronlari “havo — havo” sinfidagi raketalar bilan jihozlanadi
Turkiyaning Baykar kompaniyasi tez orada Ukrainaga “havo — havo” sinfidagi raketalar bilan jihozlangan va kamikadze dronlarga qarshi kurashishga qodir bo‘lgan uchuvchisiz uchar qurilmalarni yetkazib berishni rejalashtirmoqda. Bu haqda kompaniya bosh direktori Xaluk Bayraktar Deutsche Presse-Agentur agentligiga ma’lum qilgan.“Tez orada bizning Bayraktar TB2 va Bayraktar Akıncı dronlarimiz “havo — havo” sinfidagi raketalar bilan jihozlanadi, ular nafaqat uchuvchisiz uchar qurilmalarni, balki samolyotlarni ham urib tushirishi mumkin… biz sinovlar o‘tkazyapmiz”, — dedi u.
SAHA Expo ko‘rgazmasi chog‘ida Turkiyaning raketalar ishlab chiqaruvchi Roketsan kompaniyasi va Bayraktar o‘rtasida Sungur zenit raketasini dronlar bilan kurashish uchun integratsiya qilish haqida shartnoma tuzilgan.
“Sungur sinovdan o‘tgan o‘q, ayniqsa, vertolyot va uchuvchisiz uchar qurilmalar kabi harakatlanuvchi nishonlarga qarshi. Uning ‘havo — havo’ sinfidagi raketa sifatida dronlarimizda qo‘llanilishi o‘yin qoidalarini o‘zgartirib yuboradi”, — dedi Roketsan bosh direktori Murat Ikinchi.
Shimoliy Koreyaning raketa uchirishi ortidan Janubiy Koreya va AQSH 240 ta samolyot bilan havo mashg‘ulotlarini boshladi
AQSH va Janubiy Koreya qariyb besh yil ichida birinchi keng ko‘lamli qo‘shma Vigilant Storm havo mashg‘ulotlarini boshladi. Unda 240 dan ortiq samolyot, shu jumladan ilg‘or “ko‘rinmas samolyotlar”, xususan, F-35A “ko‘rinmas qiruvchilar” ishtirok etmoqda. Bu haqda Yonhap xabar berdi.Ushbu mashg‘ulotlar Shimoliy Koreya tomonidan bir qator raketalar uchirilganidan so‘ng, qolaversa, Pxenyan yaqin orada yadroviy sinov o‘tkazishi mumkinligi haqidagi xavotirlar fonida amalga oshirilmoqda. Janubiy Koreya mashg‘ulotlarga 140 ta samolyot jo‘natadi. AQSH esa Yaponiyaning Okinava orolida joylashgan F-35B “ko‘rinmas samolyotlar”ini taqdim etadi.
Mashqlar 4-noyabrga qadar davom etadi, deb xabar berdi AQSH Tinch okean floti harbiy havo kuchlari matbuot xizmati. Ularda AQSH va Janubiy Koreya harbiy-havo kuchlari, dengiz piyodalari korpusi, AQSH dengiz floti va armiyasining “minglab” harbiy xizmatchilari ishtirok etadi. Bundan tashqari, Avstraliya qirollik harbiy-havo kuchlarining 33-sonli otryadi mashqlar uchun KC-30A zapravkachi samolyotini jo‘natadi.
O‘zbekistonda mahkumlar uchun davlat xizmatlarini elektron shaklda ko‘rsatish imkoniyati yaratiladi
O‘zbekistonda mahkumlar uchun davlat xizmatlari, shu jumladan notariat xizmatlarini elektron shaklda ko‘rsatish imkoniyati yaratiladi. Bu haqda jazoni ijro etish muassasalarining ichki tartib qoidalariga qo‘shimchalar kiritiladi.
Unga ko‘ra, jazoni ijro etish muassasalarida saqlanayotgan mahkumlar elektron davlat xizmatlari, shu jumladan, notariat xizmatlaridan foydalanishi uchun jazoni ijro etish muassasalari ma’muriyati tomonidan alohida xona ajratiladi.
Shuningdek, mahkumlar uchun mazkur xona veb-kamera hamda dunyo axborot internet tarmog‘iga ulangan kompyuter texnikasi bilan jihozlanadi.
