Toshkent shahrida o‘qituvchilar uchun 1 milliard 5 million so‘mga forma xarid qilingani yuzasidan shahar hokimining o‘rinbosari Durdona Rahimova “Daryo”ga izoh berdi.
Toshkent shahar hokimligi oktabr oyida o‘qituvchilar uchun 1 ming 200 ta komplekt yagona forma xarid qilgan. Bu uchun budjetdan 1 millirad 5 million so‘m ajratilgan. Bitta komplekt uchun tendirda 1 million 250 ming so‘mdan 1 million 500 ming so‘mgacha ko‘rsatilgan. Forma ichiga yubka, ko‘ylak, galstuk, jaket va kofta kiradi.
Toshkent shahar hokimining yoshlar siyosati, ijtimoiy rivojlantirish va ma’naviy-ma’rifiy ishlar bo‘yicha o‘rinbosari Durdona Rahimovaning aytishicha, ushbu harakat o‘qituvchilarni ijtimoiy himoya qilish yo‘lida qilingan.
“Mazkur tashabbusdan maqsad — har bir kasb egalarida bo‘lgani kabi sharafli kasb egalari bo‘lmish o‘qituvchilarimizga o‘z formalari bilan ajralib turishi va oz bo‘lsa-da ijtimoiy ko‘mak berish. Shuningdek, ularga nisbatan yosh avlodda hurmat va ehtirom ko‘rsatish fazilatini uyg‘otmoqchimiz”, — dedi hokim o‘rinbosari.
Durdona Rahimovaning aytishicha, forma uchun belgilangan narxlar bozordagidan qimmat emas.
“Agar mahalliy ishlab chiqaruvchilardan bozor narxida sotib oladigan bo‘lsak aynan shu narxdan yuqori bo‘lishi tabiiy. Biz formalarning sifatiga ham alohida talablarimizni qo‘yganmiz. Formalar o‘qituvchilarga tekinga, Toshkent shahar hokimligining mahalliy budjetdan ortirib bajarilgan qismidan xarid qilinmoqda”, — dedi u.
Qo‘shimcha qilinishicha, 5 ming 200 nafar o‘qituvchiga mazkur turdagi formalarni berish rejalashtirilgan bo‘lib, bahorda 4 mingta forma berilgan va kuzda 1 ming 200 nafar muallimga forma berilmoqda.
Izoh (0)