BAAning Etihad Airways aviakompaniyasi O‘zbekiston bozoriga kirish imkoniyatlarini o‘rganib chiqiladi. Bu haqda Abu-Dabi amirligi madaniyat va turizm departamenti rahbari o‘rinbosari Saud Abdulaziz Al-Hosani bilan o‘tkazilgan uchrashuvda ma’lum bo‘ldi.
“Dunyo” AAning xabar qilishicha, muloqot chog‘ida madaniyat va turizm yo‘nalishidagi o‘zaro munosabatlarni yanada rivojlantirish, sayyohlar oqimini ko‘paytirish va sohaga investitsiyalar yo‘naltirish masalalari muhokama qilingan.
Har yili an’anaviy bo‘lib o‘tadigan Shayx Zoid festivalida o‘zbekistonlik hunarmandlar va boshqa soha vakillari muntazam ishtirok etayotgani ta’kidlanib, joriy yil 18-noyabr kuni ochilishi kutilayotgan navbatdagi anjuman doirasida qo‘shma tadbirlar tashkil etish masalasi ko‘rib chiqilgan.
Dekabr oyida yo‘lga qo‘yilayotgan Abu Dabi—Samarqand aviaqatnovida BAA OAV vakillari uchun infotur tashkil qilish va keyingi bosqichda O‘zbekiston OAV vakillarini Abu-Dabiga tanishuv safarini uyushtirishga kelishib olingan.
Saud Abdulaziz Al-Hosani o‘z navbatida Etihad Airways aviakompaniyasining O‘zbekiston bozoriga kirish imkoniyatlarini o‘rganib chiqilishini bildirgan.
Izoh (0)