Ўзбекистонга 2022 йилнинг 9 ойи давомида 318 156 нафар Россия фуқароси кириб келгани ҳақида хабар берилган эди. Шундан 18 киши Ўзбекистон фуқаролигига қабул қилинган.
ИИВ Миграция ва фуқароликни расмийлаштириш бош бошқармаси бошлиғи полковник Улуғбек Муҳамедов ЎзАга берган интервьюсида маълум қилишича, Россия фуқароларининг аксарияти Ўзбекистонга доимий яшаш ёки фуқароликни олиш мақсадида эмас, вақтинча яшаш мақсадида кириб келмоқда.
2021 йил 9 ойи давомида ИИВ Миграция ва фуқароликни расмийлаштириш бош бошқармасининг ҳудудий бўлинмалари томонидан 1646 нафар чет эл фуқароси ва фуқаролиги бўлмаган шахслар турган жойи бўйича доимий рўйхатга олинган бўлса, 2022 йилнинг 9 ойи давомида 1821 нафар чет эл фуқароси ва фуқаролиги бўлмаган шахслар доимий рўйхатга олинган. Уларга чет эл фуқароси учун мўлжалланган яшаш гувоҳномаси — ID-карталар расмийлаштириб берилган.
Ўзбекистонга 2022 йилнинг 9 ойи давомида келган россияликларнинг 210 минг 902 нафари эркаклар, 107 минг 254 нафари аёллар бўлган. 18—30 ёш оралиғида бўлганлар 109 минг 417 нафарини, 30—55 ёш оралиғида бўлганлар 117 минг 625 нафарини, 55 ёшдан юқори бўлганлар 73 минг 858 нафари ташкил этади.
Изоҳ (0)