Somali poytaxti Mogadishoda joylashgan Ta’lim vazirligi binosi oldida bomba o‘rnatilgan ikkita avtomobil portladi, oqibatida kamida 100 kishi halok bo‘ldi, 300 kishi yaralandi. Bu haqda mamlakat prezidenti Hasan Shayx Mahmud bayonotiga tayanib, Reuters xabar bermoqda.
Portlashlar 29-oktabr oqshomida bir necha daqiqa orasida yuz bergan; jumladan, ikkinchi bomba voqea joyiga tez yordam mashinalari yetib kelib, odamlar jabrlanganlarga yordam berish uchun to‘plangan paytda portlagan.
Mahalliy Shabelle Media Network portaliga ko‘ra, halok bo‘lganlar orasida poytaxtning Xodan tumani politsiyasi boshlig‘i, shuningdek, telejurnalist Muhammad Issa Kun ham bor.
Terakt uchun javobgarlikni hech kim zimmasiga olmadi. NOS ma’lumotlariga ko‘ra, hujum ortida Sharqiy Afrikada 20 yildan ortiq faoliyat yuritib kelayotgan “Ash-Shabob” terrorchilik guruhi turgan bo‘lishi mumkin — guruh “Al-Qoida”ga aloqador. Somali xavfsizlik kuchlari oktabr oyi boshida terror tashkiloti yetakchilaridan biri Abdullahiy Nodir yo‘q qilingani haqida xabar bergandi.
Avgust oyida “Ash-Shabob” jangarilari Mogadishodagi Hayat mehmonxonasini egallab olgan edi. Maxsus xizmatlar garovga olinganlarning bir qanchasini ozod qilishga muvaffaq bo‘lgan, biroq o‘nlab odamlar halok bo‘lgan.
Izoh (0)