Буюк Британия собиқ бош вазири Лиз Трасснинг телефони бузиб кирилган, ундаги махфий ёзишма маълумотлари сизиб чиққан, деб хабар бермоқда Daily Mail таблоид манбалари. Газета маълумотларига кўра, хакерликда «Россия учун ишлаши айтилган агентлар» гумон қилинмоқда. Москва бу хабарларга ҳали муносабат билдирмади.
Daily Mail ёзишича, хакерлик ҳақида Консервативлар партияси етакчилиги учун ёзги сайлов пойгаси вақтида маълум бўлган. Ўша пайтда Трасс хоним Британия Ташқи ишлар вазирлигининг раҳбари эди. Хакерлар ўтган йил давомида ёзишмаларга, жумладан, махфий маълумотлардан иборат хабарларга, Британия ва унинг иттифоқчилари ўртасидаги музокаралар ва Украинага қурол-яроғ етказиб бериш ҳақидаги хабарларга кириш имконига эга бўлган.
Газета манбаларининг таъкидлашича, ўша пайтдаги бош вазир вазифасини бажарувчи Борис Жонсон бу ҳодисани яширишга буйруқ берган. Бошқа нарсалар қаторида, Лиз Трасснинг дўсти Квази Квартенг билан ёзишмалар ҳам сизиб чиққан — Квартенг кейинчалик Молия вазири бўлиб ишлаган эди. Ёзда Трасс 10 йилдан ортиқ ишлатиб келган телефон рақамини ўзгартиргани ҳам маълумотни билвосита тасдиқлайди.
Ҳукумат хакерлик ҳақидаги хабарни на тасдиқлади, на инкор қилди. Расмийлар «шахс хавфсизлигини таъминлаш чоралари» ҳақида изоҳ бермаслигини айтди. Улар фақат ҳукуматда «кибер таҳдидлардан ҳимоялашнинг яхши ташкил этилган тизимлари» борлигини таъкидлади. Британия парламенти мудофаа қўмитаси раҳбари Тобиас Эллвуд Sky News’га «Парламентнинг разведка ва хавфсизлик қўмитаси қўшимча текширув ўтказиши керак», деди.
Лиз Трасс Буюк Британия ҳукуматини 2022 йилнинг 6 сентябридан 25 октябригача бошқарган. У Борис Жонсон истеъфога чиққанидан кейин сайловда ғалаба қозонди, аммо иқтисодий сиёсатдаги муваффақиятсизликдан кейин ўзи ҳам истеъфога чиқди. 25 октябрдан бошлаб Британия бош вазири лавозимини Риши Сунак эгаллаб келмоқда.
Изоҳ (0)