Ilon Mask ishdan bo‘shatilgan Twitter’ning uch nafar eng yaxshi menejeriga taxminan 187 million dollar pul to‘lashi kerak. Bu haqda CNN xabar bermoqda.
Sobiq bosh direktor Parag Agraval, sobiq moliya direktori Ned Segal va sobiq bosh yuridik direktori Vijaya Gadde Mask kompaniya ustidan nazoratni qo‘lga kiritgandan so‘ng ishdan bo‘shatilgan.
Ilon Mask kompaniyani sotib olganidan keyin Twitter’ni tark etgan boshqa yuqori lavozimli xodimlarga ham ishdan bo‘shatish to‘lovlarini berishi kerak.
Bir yil muqaddam bosh direktor unvonini egallagan Agraval kompaniya aksiyalarining eng kichik qismiga ega edi: Mask to‘lagan narxda 8,4 million dollarlik 155 ming aksiya.
Segal o‘ziga tegishli 406 mingta aksiya uchun 22 million dollar oladi, Gadde esa 642 mingta aksiya uchun 34,8 million dollar oladi.
Ammo ular aksiyadorlar tomonidan tasdiqlangan qo‘shilish shartnomasida “Oltin parashyut tovonini” ham olishi kerak. Bunga bir yillik asosiy ish haqi kiradi — Agraval uchun 1 million dollar va Segal va Gadde uchun esa 600 ming dollardan. Shuningdek, ular bir yillik tibbiy sug‘urtaga ham ega bo‘ladi — taxminan 73 ming dollar.
Hozirgacha to‘lovlarning eng daromadli qismi — ular kelajakda olishi kerak bo‘lgan, lekin hali amalda bo‘lmagan aksiyalarning tezlashtirilgan huquqidir.
Bu Agraval uchun 56,4 million dollar, Segal uchun 43,8 million va Gadde uchun 19,4 million dollarga teng.
The Washington Post nashrining yozishicha, yuridik maslahatchi Shon Edget ham Twitter egasi o‘zgarganidan keyin o‘z lavozimini tark etgan.
Avvalroq Ilon Mask Twitter’ni sotib olgani va unga o‘zi rahbar bo‘lgani haqida xabar berilgandi.
Izoh (0)