Majburiy ijro byurosining Surxondaryo viloyati Jarqo‘rg‘on tumani bo‘limi tomonidan aliment pullarini o‘z vaqtida to‘lamagan 2 nafar otalarga nisbatan ma’muriy huquqbuzarlik to‘g‘risidagi bayonnomalar rasmiylashtirilib, qonuniy ko‘rib chiqishlik uchun jinoyat ishlari bo‘yicha tuman sudiga yuborildi. Bu haqda MIB axborot xizmati “Daryo”ga ma’lum qildi.
Qayd etilishicha, jinoyat ishlari bo‘yicha Jarqo‘rg‘on tuman sudi binosida bo‘lib o‘tgan ochiq sud majlisida bolalarining ta’minoti uchun zarur bo‘lgan aliment pulini o‘z vaqtida ololmayotgan onalarning murojaati tinglangan.
Tumanda yashovchi M.A. fuqarolik ishlari bo‘yicha Qumqo‘rg‘on tumanlararo sudining 2016-yil avgust oyidagi sud buyrug‘iga asosan ikki nafar voyaga yetmagan farzandlari uchun aliment to‘lashi belgilab qo‘yilgan bo‘lsa-da, 39 million 541 ming so‘m aliment qarzdorlikni to‘lashdan bo‘yin tovlab kelgani ma’lum bo‘lgan.
Shuningdek, ochiq sud majlisida tumanda yashovchi Q.T. sud buyrug‘i bilan 2020-yil fevral oyidan boshlab 3 nafar farzandining moddiy ta’minoti uchun aliment undirilishi belgilangan bo‘lsa-da, bugungi kunga qadar jami 51 million so‘mdan ortiq aliment pulini to‘lashdan bo‘yin tovlab qochib yurgani aniqlangan.
Sudda to‘plangan hujjatlar atroflicha ko‘rib chiqilib, aliment qarzdorliklarini to‘lashdan bosh tortgan otalarga nisbatan Ma’muriy javobgarlik to‘g‘risidagi kodeksning tegishli moddalariga asosan 15 sutkadan ma’muriy qamoq jazosi tayinlangan.
Ushbu belgilangan ma’muriy qamoq jazodan o‘zlariga tegishli xulosa chiqarmay, ikki oy va undan ortiq muddat davomida aliment to‘lashdan bosh tortishda davom etsa, jinoiy javobgarlikka tortilishi haqida ogohlantirilgan.
Izoh (0)