Мажбурий ижро бюросининг Сурхондарё вилояти Жарқўрғон тумани бўлими томонидан алимент пулларини ўз вақтида тўламаган 2 нафар оталарга нисбатан маъмурий ҳуқуқбузарлик тўғрисидаги баённомалар расмийлаштирилиб, қонуний кўриб чиқишлик учун жиноят ишлари бўйича туман судига юборилди. Бу ҳақда МИБ ахборот хизмати «Дарё»га маълум қилди.
Қайд этилишича, жиноят ишлари бўйича Жарқўрғон туман суди биносида бўлиб ўтган очиқ суд мажлисида болаларининг таъминоти учун зарур бўлган алимент пулини ўз вақтида ололмаётган оналарнинг мурожаати тингланган.
Туманда яшовчи М.А. фуқаролик ишлари бўйича Қумқўрғон туманлараро судининг 2016 йил август ойидаги суд буйруғига асосан икки нафар вояга етмаган фарзандлари учун алимент тўлаши белгилаб қўйилган бўлса-да, 39 миллион 541 минг сўм алимент қарздорликни тўлашдан бўйин товлаб келгани маълум бўлган.
Шунингдек, очиқ суд мажлисида туманда яшовчи Қ.Т. суд буйруғи билан 2020 йил февраль ойидан бошлаб 3 нафар фарзандининг моддий таъминоти учун алимент ундирилиши белгиланган бўлса-да, бугунги кунга қадар жами 51 миллион сўмдан ортиқ алимент пулини тўлашдан бўйин товлаб қочиб юргани аниқланган.
Судда тўпланган ҳужжатлар атрофлича кўриб чиқилиб, алимент қарздорликларини тўлашдан бош тортган оталарга нисбатан Маъмурий жавобгарлик тўғрисидаги кодекснинг тегишли моддаларига асосан 15 суткадан маъмурий қамоқ жазоси тайинланган.
Ушбу белгиланган маъмурий қамоқ жазодан ўзларига тегишли хулоса чиқармай, икки ой ва ундан ортиқ муддат давомида алимент тўлашдан бош тортишда давом этса, жиноий жавобгарликка тортилиши ҳақида огоҳлантирилган.
Изоҳ (0)