Россияга қарши санкциялар туфайли жаҳон нефть бозорида «қайта тузилиш» ўтказилмоқда

Россияга қарши санкциялар туфайли жаҳон нефть бозори ҳозирда таркибий ўзгаришларни бошдан кечирмоқда. Бу ҳақда Forbes хабар бермоқда.

Саудия Арабистони Россия нефть оқимини Европадан Осиёга, бошқа ишлаб чиқарувчилар эса тескари йўналишга йўналтираётган вазиятга мослашмоқда.

Saudi Aramco нефть компаниясининг бош ижрочи директори Амин Носирнинг сўзларига кўра, Россия ўз нефтига тегишли чегирмалар берса, уни турли бозорларга жойлаштириши мумкин бўлади.

Чегирмалар Россияга нефтни суғурталаш ва ташиш билан боғлиқ, санкциялар туфайли юзага келган қийинчиликларни енгиб ўтишга имкон беради, — дея тушунтирди Носир.

Россия ҳамон Европага энг йирик нефть етказиб берувчи бўлиб қолмоқда, бироқ унинг етказиб беришдаги улуши 21 фоизга тушиб кетди. Бир йил аввал эса у ўртача 34 фоизни ташкил қиларди.

«Россия логистика, суғурта билан боғлиқ қийинчиликларга дуч келмоқда. Аммо буни тўғри чегирма билан ҳал қилиш мумкин. Гарчи кўпроқ вақт талаб қилса ҳам, оқим Осиёга кетади. Илгари Осиёга кетаётган нефть эса энди Европа ва дунёнинг бошқа қисмларига етказилмоқда, — деди Saudi Aramco топ-менежери.

Saudi Aramco дунёдаги энг йирик нефть компанияси ва дунёдаги энг қиммат давлат компанияларидан биридир. У Саудия Арабистони расмийлари томонидан назорат қилинади.

Аввароқ Саудия Арабистони Европага нефть етказиб бериш ҳажмини икки баравар оширгани ҳақида хабар берилганди.