Минглаб гектарда писта плантация, аҳоли учун арзон уйлар ва 500 ўринли тикув фабрика: Деҳқонобод ҳокими депутатлар кенгашида берилган ваъдасини уддалаяптими?

Қашқадарё вилоятининг Деҳқонобод тумани ҳокими Зоир Алиқулов Халқ депутатлари туман Кенгаши сессияларида депутатларга ҳудудда 2,5 минг гектар майдонда писта плантацияси барпо этилиши, аҳоли учун арзон уй-жойлар қурилиши ва туманда 500 ўринли тикув фабрика қад ростлаши ҳақида ваъда берган эди. Хўш, берилган ваъдалар бажариляптими? «Дарё» мухбири қурилиш майдонида, трактор ҳайдаб юрган Зоир Алиқуловдан шу ҳақда сўради.

Дастлабки босқичда тадбиркорлик субъекти томонидан 367 гектар ерда пистачилик плантацияси ташкил этилди. Лойиҳани амалга ошириш учун тадбиркор ўз маблағидан 2,7 миллиард сўм сарф қилган бўлса, банкдан 3,1 миллиард сўмлик кредит олди. Натижада биргина шу лойиҳа орқали ўнлаб доимий, юзлаб мавсумий иш ўрни яратилди, — дейди туман ҳокими Зоир Алиқулов.

Ҳокимнинг маълумот беришича, пистачилик билан аҳоли вакиллари ҳам фойдалана бошлаган.

Туман аҳолиси келажакда 1 гектар пистазордан 88 миллион сўмдан ортиқ 108 миллион сўм атрофида ва ҳатто ундан ҳам кўп даромад ола бошлайди, — дейди ҳоким.

Деҳқонободда шунингдек, замонавий технологиялар асосида суғориладиган 86 гектар майдонда ҳам пистачилик плантацияси ишга тушган. Умумий майдоннинг 6 гектари ёмғирлатиб, қолган қисмида эса томчилатиб суғориш ишлари якунига етказилмоқда. Эътиборга молик жиҳати шундаки, ҳудуднинг ҳар бир секторидаги писта кўчатларини масофавий усулда суғориш имконияти мавжуд. Ҳатто масъуллар қўл телефони орқали ҳам бу ишни бажариш мумкин.

Таъкидланишича, Президент Шавкат Мирзиёев топшириғига билан туманда ташкил этилаётган пистачилик плантацияси уч босқичда амалга оширилади.

Иккинчи босқичда тумандаги пиллачилик ва қоракўлчиликни ривожлантириш қўмитасига тегишли 1120 гектар ер майдонига писта дарахти экилади. Лойиҳа қиймати 16,2 миллиард сўм бўлган иш натижасида яна 217 та доимий, 361 та мавсумий иш ўрни яратилади. Сўнгра ўрмон хўжалигининг 1000 гектар ер майдонида пистачилик плантацияси ташкил этилади.

Туманда «Dehqonobod City» кўп қаватли уйлар мажмуаси қурилиши ҳам бошлаб юборилди. Мажмуа очилишида ҳурматли вилоят ҳокимимиз Муроджон Азимовнинг ўзлари иштирок этиб, бошлаб берганди. Шаҳарча асли деҳқонободлик тадбиркор Тоҳир Саидов раҳбарлик қилаётган «Sof Mad Build» МЧЖ томонидан 8 гектар майдонда 1034 нафар аҳолига мўлжаллаб барпо этилмоқда, — дейди Зоир Алиқулов.

Туманда тадбиркор Шавкат Шарипов ташаббуси ва ҳомийлигида 500 та янги иш ўрни яратадиган тикувчилик фабрикаси барпо этилмоқда. Бир гектар майдонда барпо этилиши режа қилинган корхонанинг ишга тушиши 50-60 миллиард сўмга тушмоқда, — дейди туман ҳокими.

«Дарё» туман ҳокимлари томонидан берилган ваъдалар ижроси қандай бўлаётгани борасида қизиқишда давом этади.